New Era Newspaper

New Era Epaper
Icon Collap
...
Home / Aagundjuka yamwe inaya hala okuhogolola 

Aagundjuka yamwe inaya hala okuhogolola 

2019-11-21  Staff Reporter

Aagundjuka yamwe inaya hala okuhogolola 

Victoria Kaapanda

OSHAKATI – Omanga yamwe yomaanyasha mondoolopa yaShakati taya ti yo itaya hogolola, yamwe otaya tsu ooyakwao omukumo opo ya hogolole yo ya kale ye na uuthemba oku pula shoka ya hala okuningilwa kepengelo ndjoka ya tula koshipundi.

Moonkundathana naKundana aagundjuka yamwe oya ti oya loloka, onkene kaye na nande ohokwe nomukumo gokukutha ombinga momahogololo gopaupresidente.
 “Otwa kuutumba noonzapo dhetu momagumbo, katu na iilonga nepangelo lyetu kali tu wete nando. Oshike tu na okuhogolola tse katu shi uutoye wokuhogolola aaleli yetu, inaye tu longela uuwanawa sigo onena. Otaya ilongele uuwanawa yoyene ashike,” osho omugundjuka ngoka a ti edhina lye oMicheal Ndimbwa a ti ngaaka.

Ta gwedha po ta ti ye omukwaSwapo okuudha, ke li nando ompinge nongundu tayi lele, ye ke li nando koongundu dhoompilameno ashike iilonga mbyoka ongundu tayi pangele tayi longo ine yi panda.
Ndimbwa ta ti sigo onena ina tsa ondjodhi okuthiga po ongundu yoSwapo oshoka natango ke wete ngoka a wapala nota vulu okulela oshilongo shaNamibia. Ta ti ngeno okwa li tashi shuwa ngeno otaya shuna ko omukokoli gwoshilongo Sam Nujoma. Ta gwedha po ta ti  oshilongo osha manguluka omimvo 29 dha pita ihe kape na nando elunduluko lyasha, aakwashigwana otaya nu omeya gomomithima, aanyasha kaye na iilonga, oosikola niipangelo inayi gwana yo kayi na iilongitho ya pumbiwa moshilongo.

Nonande ehwata lyaanyasha olyi li ompinge nongundu tayi lele, Aina Pandeni okwa ti ye ke na nando esiku a pilamene ongundu yoSwapo oshoka ke wete ngoka ta vulu okulela oshilongo shaNamibia kee shi Swapo.
“Uuwanawa waSwapo ondi wu shi oshoka onda manguluka, onda mona ompito yokulongwa, ohandi yi koshipangelo ngele tandi alukwa, omanga iilongo yimwe sigo onena oompito dhi li ngaaka ihayi yi mono,” Pandeni ta ti ngaaka. Ta pula kutya ongundu yini tayi vulu okulela oshilongo shika kayi shi Swapo? “Omwa tegelela ashike iita yi ye moshilongo kamu shi kutya oye ya ngiini ano ngele aanyasha oya hala onakuyiwa yi li nawa naya hogolele omupresidente Hage Geingob. Omugundjuka gumwe okwa li a popi ta ti:  “Elalakano okuulikila aaleli yetu kutya tse huka otu li ko tatu li tatu pi notwa loloka, katu shi ngele iimaliwa kayi mo shili moshilongo nenge oyo ye yi na yoyene oshoka oho uvu ashike oomiliona ngapi ngapi dha liwa kaanapolitika ihe kaye na sho haya ningwa.” 

Ta gwedha po ta ti yo otaya kondjele onakuyiwa yuunona wawo oshoka ngele oya kala ya mwena omanga pe na ethimbo, oshilongo shika itashi ka kala nasha ayihe otayi ka ya naakwiilongo. Immanuel Thobias Okwa li a kumagidha aanyasha ayehe momasiku 27 gaNovemba nuumvo ya thikame opo ya ka hogolole. Okupopya kaku na sho taku ti shoka shi na sha okuthikama nokuhogolola ongundu ndjoka ye wete tayi eta elunduluko moshilongo.


2019-11-21  Staff Reporter

Tags: Oshana
Share on social media