“Otatu kambadhala mpoka tatu vulu, ihe oongeshefa dhetu odha yiwa moshipala, kiikutu hayi zi kiilongo yokondje, momukalo ngoka gwa tseyika nawa nedhina ‘Order with me’.
Ndhoka odha popiwa komuhondji Ndinelago Shinyengu ngoka e na oshinayeta mOshakati.
‘’Oongheshefa dhokuhondja odha kala tadhi shi enditha nawa omanga omashingitho ngoka gokomalungula inaaga ye po,” ta ti ngaaka.
Shinyengu okwa ti okwa tameke okuhondja omimvo 20 dha piti, ihe ota ti, okuhondja kaku na we oshimaliwa ngaashi omimvo dha piti.
“Ongeshefa oya ka tameka okushongola nduno unene konima omukithi goCovid-19 sho gwa ponokele moshilongo, nonando twa kala nale tu na uupyakadhi wookastoma,” ta popi ngaaka.
Ta ti, okuu vite shi i kutya okulanditha kokomalungula okwa gandja wo natango oompito dhiilonga koyendji, ihe ngeno okwa li haya landitha shoka sha pumba mo moshilongo nenge ihaashi landithwa mo nando.
Omuhondji ngoka okwa ti, ngaashi ethimbo ndika lyAguste, ethimbo lyi na iituthi yomanyanyu ngaashi oohango, omashasho nomakoleko.
Ta ti, shito omwedhi nguka ngeno sho tagu ka hula, ondjato oya pateka, noN$ 40 000, okwa li he yi mono.
“Omimvo dha piti ethimbo ndika ngeno okambo kandje okuu dha nale omadhina gookasitoma, ihe sigo opaife inandi dhengelwa ongodhi,’’ ta nyenyeta ngaaka.
Ta ti, uupyakadhi mboka owa etwa kaantu taya landa iikutu yawo okuza kondje yiilongo.
“Ondi uvite kutya Aanamibia otse katu uvite ko, oshoka ngele owu na shoka wa hala okuzala, oshike itoo lombwele omuhondji e shi ninge ngaashi to pula, nongele okwa nyengwa omuhondji omutiyali ita nyengwa oku shi hondja,” ta popi ngaaka.
Shinyengu ta ti, Aanamibia ohaya nyenyeta kutya kamu na iimaliwa moshilongo nenge kamu na iilonga moshilongo, otayi kala mo ngiini ngele otamu yi tutile kondje yoshilongo.
“Natu kaleni tatu yambidhidhathana, oshowo okusimaneka omuthigululwakalo gwetu, tu kaleni twa simaneka shetu yene,” ta kumagidha ngaaka.
Mirjiam Sholongela ngoka naye ha hondjo iikutu okwa ti epangelo nali ninge po sha, okugamena oongeshefa dhawo kaadhi hule po, oshoka ngele shika otashi tsikile otaya ka pata ongeeshefa dhawo dhokuhondja.
“Olye e na oku tu sapota ngele Aanamibia aakwetu oyo ashike ye na oku tu sapota. Otandi indile wo natango epangelo lyi tu yambidhidhe tse mboka tatu nyangadhala, opo tu nenepeke oongeshefa dhetu,” ta indile ngaaka.
Ehangano lyoNaloba, olya ti olyi li ompinge naakwiilongo taya landitha shoka tashi vulu okulandithwa kOmunambia.
Aakwiilongo naya landithe shoka kaashi mo moshilongo nenge itaashi vulu oku etwa po kOmunamibia, onkene Aanamibia nayo naya longithe ompito ndjoka okwiisapotathana.