Aakwashigwana yomihoko dha mona iihuna moshitopolwa shaMusati onkene ngaa inaya lola oshikuki  shepangelo shoka  shedhina Emergency Income Grant (EIG) shooN$750 molwomashongo ga yooloka.

Aayele noshowo Aahimba inaya mona oshikuki shoka omolwaashoka aniwa kaye na oongodhi, omanga yalwe kaye shi okulesha nokunyola noshowo yamwe kaye na uumutse woshilongo mboka tawu pulwa onga oshipumbiwa shaamboka taya ningi eyindilo.

Ookansela yiikandjohogololo moka mu na aadhimbiwa mbaka ngaashi Ruacana noshowo Otamanzi onkene ya hokolola kutya mbaka oya hupa ko ashike mboka kaye na oongodhi otashi vulika ya ka ninge elago ya shangwe moofooloma dhopeke opo ya mone oshimaliwa shoka ihe shoka otashi ningwa mbala omanga esiku lyahugunina inaali thika. Kansela gwoshikandjohogololo shaTamanzi Johaness Iyambo okwa hokolola kuKundana kutya aantu oyendji yomomahala ngaashi Amarika nOnkaankaa inaya mona sha, omu na ashike aantu ye li yatatu oyo ya mona oshoka aakwashigwana mboka kaye na oongodhi ya wape okutuma omatumwalaka ngoka.
“Mboka ye na oongodhi onkene nduno ya kambadhala okulongitha oongodhi dhayakwawo ashike ngashiingeyi natango inaya mona sha. Shoka nokuli sha eta egeyo mokati kawo,” osho kansela a hokolola ngaaka.

Omanga Andreas Shitama a hokolola kutya moshitopolwa she aakwashigwana mboka yalwe okwa li ya mona uumutse ashike wumwe owa kana omanga yamwe ya thanekwa ashike oye na ashike uutegelelitho wuumutse wawo inaya ka tala ko uumutse wawo.
Ashike omupopiliko gwuuministeli woshimaliwa Tonateni Shidhudhu okwa hokolola kutya osheetithi henda kutya aakwashigwana mboka kaye na omikanda ndhoka tadhi pulwa nuuministeli kawu na shoka tawu vulu okuninga po.

“Omulandu ogwa folomwa po momukalo ngoka tagu pula okamutse na ngele kapu na okamutse nena ito mono ekwatho. Oya pumbwa okuya moonkundathana nuuministeli wiinima yomegumbo opo ya tale kutya otaya mono uumutse ngiini omanga esiku lyahugunina inali thika,” osho Shidhudhu a hokolola ngaaka.