New Era Newspaper

New Era Epaper
Icon Collap
...
Home / Aakalimo monooli ya kwathele mboka ye li mompumbwe kErongo

Aakalimo monooli ya kwathele mboka ye li mompumbwe kErongo

2020-07-10  Helvy Shaanika

Aakalimo monooli ya kwathele mboka ye li mompumbwe kErongo

ONGWEDIVA - Aakalimo yamwe miitopolwa Oshana, Omusati, Oshikoto nOhangwena oya itula kumwe e taye ya po nooshako dhiilya opo ya kwathele aakalimo yokErongo mboka ngashiingeyi ye li mepato.
Oshitpolwa shErongo osha ninga ethimbo shi li mepato omolwa etaandelo lyoCovid-19 ndjoka tayi taandele moshitoplwa shoka.
Omupoliliko gwongundu Dr. Ben Mulongeni okwa ti aantu mboka taya longo kohi yongundu tayi ithanwa Kwafela Oshiwana (Help the nation), sigo onena oya tambula ooshako odhindji dhomahangu, omatanga omaliwa, omakunde, omakaka niikwao yilwe. Ta ti iikulya mbyoka otayi ka pewa aantu ayehe ye na ompumbwe yiikulya kErongo, kashi na nee kutya oyomuhoko nenge olwaala luni.

Ta ti okakomitiye ngashiingeyi oka longekidha ololi opo yi fale ko iikulya mbyoka ya gongele po, taye shi ningi okupitila mombelewa yaGavena waShana Elia Erimari. Ta ti Gavena okwa tambula ko oshinima shoka nomaako agehe.
Paulus Cornelius ngoka e ya po nedhilaadhilo okwa ti okwa li a lala kongulohi esiku limwe sho a uvu ewi tali mu lombwele ta li ti ‘kwathela oshigwana’. 

“Kandi shi nee ngele oshinima osha li ondjodhi nenge ongiini, ashike sho nda penduka, ewi ndyoka olya kala tali kwelengendja nayi mungame. Olya piyaganeke ndje noonkondo shoka sha etele ndje opo ndi tokole okupatulula oradio opo ndi idhimbwithe,” Paulus ta ti.
Sho a patulula oradio okwa ka iyadha koEagle FM hoka kwa li aakwashigwana yokoWalvis Bay taya nyenyeta ondjala. 
Ngaashi aakwashigana ooyakwao Paulus naye wo okwa dhengele ko koEagle FM andola naye a yambidhidhe mboka ya li taya nyenyeta.
“Ashike kandi shi kutya oshike she ya mungame. Pehala lyokukema ngaashi nda li nda dhilaadhila onda haluka owala nda ti: ‘Omolwashike naanaa itaatu gongele iilya huka konooli e tatu tumine kOmbaye, tu kwathele yamwameme mboka taya si ondjala. Oshinima shoka hasho nda li nda hala okupopya ashike ondi iyadha owala te ti ngaaka,” Paulus ta ti.

Sho a tula po ongodhi, aantu oya tameke okudhenga koradio taya kongo ongodhi ye naantu oyendji oya tameke okugandja omayambidhidho.
Aakwashigwana yamwe oya iyamba wo okugandja omahooli ngaashi mwene gwOkapana Service Station mOndangwa ngoka a gandja omahooli gongushu yoN$11 700, okugandja ootraka omanga yamwe ya yi oku ka kwathela okuthitha nokutula iilya momeya omanga inaayi tumwa komashina yi ka tsuwe.  

Ayehe Mulongeni naPaulus oya pula oshigwana shi tsikile nokugandja mpaka taya vulu –ya gandje omakwatho kehe mwa kwatelwa gopashimaliwa, ngoka taga ka longithwa oku tsitha iilya. 
Mulongeni ta pula wo ngoka e na ehala unene mOndangwa, Oshakati nOngwediva opo li longithwe okupungula iinima mbyoka tayi yakulwa po.
Mongashingeyi meme Magdalena Ruanda, omukalimo gwOmondangwa oye a iyamba okugandja ongalashe ye yi pungulilwe omagano ngoka ashike ngashiingeyi itayi gwana mo we. 


2020-07-10  Helvy Shaanika

Tags: Oshana
Share on social media