New Era Newspaper

Icon Collap
...
Home / Aakalimo yomolukanda Onhimbu ya hala uundjugo waakwashigwana

Aakalimo yomolukanda Onhimbu ya hala uundjugo waakwashigwana

2021-05-03  Victoria Kaapanda

Aakalimo yomolukanda Onhimbu ya hala uundjugo waakwashigwana
Top of a Page

Victoria Kaapanda

Aakalimo yomolukanda Onhimbu moshitopolwa shaMusati otaya nyenyeta kutya ompito yokumona omikithi dha yooluka, oyi li pombanda oshoka kaye na uundjugo waakwashigwana, unene pethimbo ndika lyomukithi gwoCovid-19.

Omukalimo gwomolukanda  Onhimbu  Petrus Nghifilai, okwa ti onkalo yokwaa na uundjugo waakwashigwana molukanda oya thiminike aakalimo yi ikwathele konima yoombashu dhawo yene nenge miihwa yi li popepi.

Ta ti, aakalimo oyendji ye li molukanda moka, kaye na iilonga, oshowo oyendji kaye na iiyemo yasha, onkene itaya vulu okwiitungila uundjugo wawo yene.

 “Uundjugo mboka taya vulu okulongitha ya manguluka owu li kokule kondoolopa, mboka wu li pomahala gwomanwino nenge poositola, ihe ohawu futilwa,” ta popi ngaaka.

Ta ti, ngele owalegaalega momudhingoloko aguhe, oto nyanyala, aakalimo otaya  ikwathele kehe mpoka taya adha, oshoka kape na uundjugo waakwashigwana.

“Otashi sitha ohoni okwiikwathela mokati kaantu, unene ethimbo lyomutenya omanga pe na aantu taya ende taya tala,”  a popi ngaaka.

Omukalimo gumwe gwomolukanda moka Maria Nehemia okwa ti, ohaya pulwa okufuta oondola dhontumba okulongitha uundjugo wopawumwene.

“Kondoolopa hoka natango haku futwa okokule, ethimbo limwe uusiku, ohatu tila okuyugwa iinima yetu kaafuthi, osha nika oshiponga noonkondo, onkene katu na nkene ohatu yi ashike konima yoombashu hoka,” ta hokolola.

Nehemia okwa gwedha po ta ti, natango oya pumbwa olusheno momagumbo gawo, ngaashi iitopolwa yimwe ya gandja omalusheno goshali kaakalimo yomomalukanda.

“Molukanda muka onda kala mo omimvo dha pita puheyali, nondi uvite kutya olukanda nduka olwa kala po omimvo dha pita po 15, ihe kandi mona elunduluko nenge ehumokomeho,” ta popi ngaaka.
Ta ti, okulongitha iihwa oshowo konima yoombashu oshisithahoni noonkondo, unene koomeme.

Omukalimo gwomolukanda Onhimbu Shaanika Negumbo, okwalombwele Kundana ta ti, omanga kape na uundjugo waakwashigwana ayehe, kaye na uundjugo, otaya ikwathele ashike kehe mpoka e wete kutya kape na omuntu e mu wete ethimbo ndyoka.

“Pomahala mpoka hatu zi nenge hatu lala opo ngaa pe na omahala gwokwiikwathela. Elelo lyondoolopa nali tu tale, tse mboka itatu vulu, nando onuundjugo uyali nenge utatu,” ta popi ta nyenyeta.

Selma Nekwiita meme gwaanona yaali gwomolukanda Onhimbu okw ati, oya hala oopomba dhomeya, uundjugo  okukaleka po uundjolowele wawo, unene ethimbo ndika lyoCovid-19.

Omukuluntu gwomidhingoloko nuundjolowele melelo lyondoolopa yOutapi Herman Neumbo okwa ti uundjugo waakwashigwana molukanda moka omo wu li nonando inawu gwana.

“Out li momalongekidho okugwedha ko uundjugo uwali nenge utatu. Omeya oko ge li, kehe ngoka a hala omeya gwopawumwene okwa manguluka okuninga omayindilo,” a fatulula ngaaka.


2021-05-03  Victoria Kaapanda

Share on social media
Bottom of a page