New Era Newspaper

New Era Epaper
Icon Collap
...
Home / Aakalimo yomOmusati taya kongo uuhupilo mokukwata oohi

Aakalimo yomOmusati taya kongo uuhupilo mokukwata oohi

2021-05-06  Victoria Kaapanda

Aakalimo yomOmusati taya kongo uuhupilo mokukwata oohi

Victoria Kaapanda

Oshana shaShitutuma moshitopolwa shaMusati osha ningi ehala lyuuhupilo lyaaakalimo yomomudhingoloko moka oshowo yomomikunda dhopopepi.

Oshiwike sha zi ko sho oshifokundaneki shika  sha talele po omukunda Oshitutuma osha li sha mono aantu ya thika po 40, taya kwata oohi moshana moka. Mirjiama Shanghala a yambukile momukunda Okalumbi, ngoka gu li popepi nOshitutuma okwa ti, shoka she ya eta moshana taya lala taya lika koomwe uusiku awuhe, uuhupilo ashike. Ta ti, oku uvite kutya oyendji ohaya thiki pOshana shaShitutuma oshoka oshi li pomatondokelo gomeya, noohi ohadhi kala mo odhindji.

Shanghala okwa ti, aantu yamwe oya za kiitopolwa ngaashi Outapi Okalongo oshowo omikunda dhopopi , okukonga uuhupilo. “Oyendji tu li mpaka ihatu longo, katu na iiyemo yasha onkene otatu kondjitha okukwata oohi oshowo oontangu, tu ka landithe oshowo okufala omweelelo komagumbo,” ta ti ngaaka.

Ta popi ta ti, nonando ye li moshana yo inaya za komagumbo gamwe ayehe, oye na elongelokumwe oshowo ombili. “Mpaka otu li po twa dhika ootenda, moka hatu lala. Otwa dhika oonete dhetu momeya, dhi li momikweyo epala lyondjamba opo kehe gumwe a mone ompito yokukwata oohi dhe, kaape na ngoka e li mukwawo komeho.

Ta gwedha po ta ti, oye na ethimbo ndyoka haya yi momeya, ya tale ngele omwa ya oohi. Momeya ohaya yile mo oshita, yo taya zi mo oshita. Shanghala okwa ti, moshana moka oye li mo naalumentu, taya kongo uuhupilo netompelo lyokwiinyangela yoyene, oshoka inaya hala oku ka guma iinima yaantu, yi ininge oonyala oonde.

‘’Nonando shoka tatu mono ngele twa landitha kasha shi oshiyamba, otatu nyangadhala ngaa okutula omboloto poshitaafula osho wo okuyambidhidha aanona yetu ye li koosikola,”  a popi ngaaka. Ta ti, otaya pandula sigo onena, inaya indikwa okuhuga oohi dhawo moshana moka.


2021-05-06  Victoria Kaapanda

Share on social media