Aangwediva unene tuu aakwanegongalo yongeleka onkwa Katoolika kaRoma (Roman Catholic Church) otaya lili omudiakoni omukulu Desiderius Hamayulu.
Hamayulu ngoka a adhikwa eli moshipundi shevululuko okwa hulitha mOmaandaha moshipangelo shopaumwene mOngwediva mepipi lyomimvo 76. Kale koshilonga shopambepo, Hamayulu okwa li a tseyika nawa onga omulongiskola paithano, a li omukuluntusikola kOmashakediva mOshitopolwa shaNgwediva omanga inaa ya moshipundi shevululuko.
Omumbiisofi Ndumbukuti Nashenda ngoka a tseyitha eso lyaHamayulu ohela kaaleli yongeleka okwa ti omudiakoni nguka okwa longele ongeleka onkwa Katoolika uule woomvula 37. Ta ti okwa li a yapulilwa oshilonga shuudiakoni mo 1985 komumbiisofi Bonifatius Haushiku.
“Otandi gandja omahekeleko kaakwanezimo lye, notandi ya kwashilipaleke kutya otu li nayo momagalikano notu na uukwawo wanankali pethimbo ndika endhigu,” Nashenda ta nyola.
Omudiakoni Albert Ndahalele ngoka a longo pamwe naHamayulu uule woomvula odhindji okwa ti okwa tseya omudiakoni nguka uule woomvula dhili lwopo30 lwaamboka.
“Pethimbo mpoka ngame onda li omukwanegongalo kOshakati, yo oye li kOngwediva nootate Oswald Shivute. Oyo ya toto po egongalo lyaNgwediva. Sho nda tembukile kOngwediva opo nee ndeke mu tseya nawa. Oye a tumu ndje kosikola opo ndi ki ilongele uudiyakoni. Ano opeke lye nda pitila,” Nda halele ta ti.
Moku dhimbulukwa Hamayulu, Ndahalele okwe mu hokolola onga omulumentu a li omunashili, ngoka kaali e shi oku fundja.
“Kuye oshili oshili ashike. Okwali wo e na ohole nondjungu miilonga, ashike oshinima oshinene okwali ehole oshili,” Ndahalele ta ti, ye ta dhimbulukwa iiningwanima oyindji ya ningwa kuHamayulu mbyoka tayi holola uukwatya we wokuhola oshili. Ta ti Hamayulu okwali e na eitulomo enene miilonga, oku gandja omakwatho gopambepo, na unene okwali e na oshisho noku talela po aakulupe, aantu ye na uulema nosho we aantu ye na uunkundi itaaya vulu oku thika kongeleka.
Omudiakoni Protasius Uuyuni ye okwa hokolola Hamayulu onga omulumentu ngoka a li omu ifupipiki. “Ka li e hole iimima iiwinayi.
Ngele okwa popi sha mongeleka ndele egongalo olya fa onaali shi panda, oha gandja ombili mbala. Onde mu tseya wo onga omulumentu gwomashendjo ogendji,” Uuyuni ta ti. Omushangwa gwomumbiisofi otawu holola kutya Hamayulu okwa thigi ko omukulukadhi gwe meme Agata Ludwig, aanona 10 naatekulu oyendji.
Omalongekidho gefumbiko opo taga tseyithwa.