Omugandji gomauyelele melelo lyondoolopa lyaNgwediva Jackson Muma okwa ti, oya kuta aakeleli yomaliko ye li 120, okutula po omalandulathano showo oku gandja egameno.
Muma okwa ti aakeleli yomaliko ye li 60, otaya kala haya longo ethimbo lyomutenya omanga ye li 60 taya kala taya longo ethimbo lyuusiku.
“Otwa mono aakeleli yomaliko okuza komahangano ga yooloka, ngaashi koBertha Security Service, Total Protection Security, Shikuvule Security Service noTriple One Security,” ta popi ngaaka.
Muma okwa ti, otapu ka kala egameno lya kwata miiti okukelela iimbuluma yi holoke momauliko giipindi.
“Otwa hala omauliko giipindi gaka ga ende nawa gaana uupyakandhi wa sha, nashoka otashi holoka uuna aakeleli yomaliko taya tula po omalandulathano ge li nawa nokukelela iiningwanima iiwinayi yi holeke,” ta ti ngaaka.
Omauliko giipindi otaga tameka oshiwike shika mEtine.
Omawuliko giipindi mOngwediva okwa li ga patuluka lwotango momumvo 2000, nonuumvo oge li kohi yoshipalanyolo “Okugalula nokuyeleka eliko”.
“Iipindi mbyoka ohayi gongaleke aanangeshefa oshowo aantu yaza ko kule, taya ulikilathana uunongo niilonga yawo, mehala limwe,” ta popi ngaaka.
Muma okwa ti, nuumvo oya tengeneka okukala yena aawuliki yiipindi ye vule 200, okuza koombinga noombinga.
Ta ti, elalakano okugandja ompito kaanangeshefa oshowo ko mahangano guulike iishingithomwa yawo oshowo okugalula eliko mondoolopa yaNgwediva.
Omawuliko giipindi otaga ka ulika iilandithomwa ayihe okuza kiikulya, kiizalomwa na kehe shoka hashi vulu oku etwa po noonyala oshowo oku eta oombelewa hadhi gandja omayakulo ga pumba po pepi.
Muma okwa ti, omawuliko giipindi go numvo otaga ka kala ga yooloka komakwawo, oshoka otaga ka gandja wo ompito no kaanangeshefa mboka itaya vulu okuthika.
“Ota tu ka ulikila mboka itaaya vulu okuthika, okupitila ko mathano gokomalungula gwopashinanena sigo oomwedhi hamano ko nima yoma wuliko giipindi ga pwa,” a popi ngaaka.
Ta ti, shoka otashi ka kwathela okulikila mboka itaaya vulu okuthika, no yena ehalo lyoku tala oshowo okuulika iilandithomwa yawo.