Victoria Kaapanda

Aakiintu mboka ya li ya longekidha eyugo lyiimaliwa miilonga yawo, oya mangwa po konima gumwe a li a popi oshili kutya oyo ye shi longekidha.

Omugandji gomauyelele gopolisi moshitopolwa shaShikoto Ellen Nehale okwa ti oshiningwanima osha holoka lwopotundi 02h00 pohotela tayi ithanwa Makalani hotel, mondoolopa yaTsumeb.

Otaku hokololwa kutya aakiintu mboka okwa li ya kutu aalumentu yaali, mboka kwa li ye ya oku ya yuga iimaliwa ethimbo ndyoka, omanga ye li miilonga.

“Aalumentu mboka okwali ya konkola tango, noya li ya egululwa kwaangoka lyokuthikila. Anuwa okwa li ye mu undula noku mu fala hoka ku na iimaliwa ya pungulwa,’’ ta hokolola ngaaka.

Ta ti, anuwa aalumentu mboka yaali okwa li ya teya okasikopa hoka ka li ke na iimaliwa noshitenda shoka ya li ya enda nasho.

Nehale ta ti, aalumentu mboka oya li ya kutha mo oshimaliwa shi thike poN$192 000, noku ya ontuku nasho.

Konima gumwe gwomaakiintu ngoka a li a pulwaapulwa kopolisi, okwa li a popi oshili kutya oyo ya longekidha oshiningwanima shoka pamwe naaniilonga yakwawo ye li yaali.

“Aakiintu mboka aanilonga yatatu anuwa okwali ya yaka oshimaliwa N$15 000 miilonga, shoka kwali ya hala okufutila po, ihe kakwa li ye na oshimaliwa. Sho osho ya longekidha okuyakitha mo iimaliwa mbyoka ya tye oya yakwa po,’’ ta ti ngaaka.

Ta hokolola kutya aalumentu mboka otaya fekelwa ye li koWindhoek, nopolisi otayi longo nuudhiginini  oku ya konga opo ya mangwe.

Iimaliwa inayi monika.

Moshiningwanima shimwe, Omuchiina gomukiintu okwa yugwa iimaliwa N$600 000 sho a li a ponokelwa kaafuthi mehala lyiilonga ye koWindhoek Lafrenz.

Otaku hokololwa oshiningwanima sha holoka lwopotundi 22h00, koHansa City moWindhoek.