Aakonaakoni yapyokoka mopolisi yaNamibia yatatu, otaya ka tumwa koBotswana oshiwike shika opo yaka kuthe ombinga momakonaakono gomadhipago gaalumentu aamwayinathana Aanamibia mboka ya dhipagelwa koshishiindalongo hoka oshiwike shazi ko. Aamwayinathana mbaka oyo Tommy Nchindo, Wamunyima Nchindo, Martin Nchindo mboka li ya dhipagwa pamwe naSinvula Munyeme, omukwashigwana gwaZambian, sho ya yahwa okusa ketanga lyegameno lyoBotswana Defence Force (BDF), sho ya adhika taya yulu oohi momulonga gwaChobe popepi noKasane moBotswana mEtine lyoshiwike shazi ko. Inspector-General gwopolisi yaNamibia, Lieutenant-General Sebastian Ndeitunga okwa ningi etseyith ndhika, pethimbo a li a ithana oshigongi shiikundaneki oshiwike shazi ko mOshakati moshitopolwa shaShana.
Ndeitunga okwa ti aakonaakoni mboka yoNamPol otaya yi mOmaandaha goshiwike tashi ya koBotswana opo ya ka yaka kale mongundu yaakonaakoni mboka kwa tengelelwa opo ya tameke mEtiyali.

Onkundana ndjoka yedhipago lyaakwashigwana yaNamibia nOmuzambia oya yakulwa nomaiyuvo ga yooloka moka oBDF tayi ti oya dhipaga aalumentu mbaka oshoka oya li yamwe yomelyenge ndjoka hali ka ninga uukongo gwiiyamakuti kaagu li payeta moshilongo shawo. 

Ashike Aanamibia oyendji nAabotswana yalwe otaya ti ndhoka tadhi popiwa koBDF odhanakalindi, oshoka aalumentu mbaka oya kala ye shiwike nawa miilongo ayihe iyali onga aayuli yoohi, noya kala haya ningi oshinima shika pauyuki. 
Yamwe otaya ti ishewe omulonga gwaChobe ogu li pokati koongamba, onkene kagu shi gwa Botswana oye awike, ihe igwiilongo ayihe iyali. 
“Omakonaakono ngaka otaga ka ningilwa nopehala mpoka pwa dhipagelwa aantu opo ku talike kutya aantu mboka oya yanhwa ngiini, nosha ende naanaa ngiini opo ya dhipagwe,” Ndeitunda ta faatulula. 

Ta gwedha po kutya, kakele kaakonaakoni mboka taya yi mOmaandaxa, iilyo iyali yoNamPol, otayi ka ya pamwe naakwanezimo yoonakusa yayali koBotswana opo yaka tale nkene omakonaakono gomidhimba taga ningwa. Omakonaakono ngoka otaga ka ningwa mEtitano. 
Kakukutu komatanga gopolisi yaNamibia okwa longitha wo ompito ndjoka oku kunkilila Aanamibia opo ya iyage ke oku taaguluka oongamba pomahala ngoka inaa ga pitikwa oku taagulukwa paveta. Ta ti aantu naya kala taya kongo omishangwa tadhi ya pe uuthemba gwoku taaguluka oongamba. 

“Otu na okusimaneka ooveta ndhoka dha tulwa po kaashinda yetu, ina tu taaguluka we oongamba kaatu na omikanda dhuuthemba,” ndeitunga ta kunkilile. –Nampa