Victoria Kaapanda

ONGWEDIVA-Nonando oshikukuta tashi topolwa miitopolwa ayihe moshilongo kwaamboka ya dhengwa unene koluhepo, moshikandjohogololo shaEtayi momusati oomwalu gwaamboka ya dhengwa koluhepo yo taya mono iihuna ogu li pombanda noonkondo.

Omukulupe gwomimvo 100 Wilhemine Shevanyena, okwa li a lombwele Kundana ta ti onkalo otayi thindi kesipa, nonande e na aatekulu ye li 12 kumwe naatekulululwa, ayehe oya tala ashike mopenzela yomukulupe, ano ashihe tashi inyenge megumbo oshi na okulandwa kopenzela ye.
Uutekululwa awuhe wu li utano kape na nando okamwe haka kwata iimaliwa yuunona wu na oluhepo oshoka kape na aniwa uuthemba wa gwana po.

“Okatekulululwa kandje haka Saara Haimbodi (4) oko omeho gandje, ka ka za po ponto yandje mpa, ngele nda hala sha oko haka tondokoka ka talele ndje shoka nda pumbwa. Okatekulululwa kandje kamwe oka tembukila puushinda, oko nee haka etele ndje ngele aashiinda ya teleke okathima ko taka tondoka ka etele ndje,” omukulupe ta ti ngaaka.

Ta gwedha po ta ti aatekulu oyendji mbeya megumbo oya tauka mo, anuwa oya ka konga iilonga, ihe ngele omwedhi  gwa idhenge po yo otaya galukile kegumbo  niikaha yowala.

Omukulupe ta ti iha vulu oku enda oshinano nande oshi hupi. Kiihwa hoka haku ikwathelwa okokule noonkondo iha adha ko onke noha engene ashike pooha dhegumbo. “Epangelo ina li tu yambidhidha nuundjugo waakulupe ngaashi yakwetu yamwe ya kwathelwa, onkalo ndjika ondhigu noonkondo.   Iimaliwa yandje yopenzela onde yi siikilitha puushida oshoka megumbo otayi yakwa mo kuwalye, omeya ngoka tandi nwitha omiti dhandje dhoosuka ohandi tumu okatekulu kandje ka ka tale komuthima oshoka kape na okapomba komeya omayelele,” Shevanyenga ta yelitha ngaaka.  Omukulupe omukwao gwomivo 85 moshikandjohogololo shaEtayi ngoka, ha zi oye awike megumbo okwa ti  oomwedhi nande mbali ohadhi vulu okupita po ina ikosha kolutu oshoka iha vulu oku enda a ka tale omeya.

Ta gwedha po ta ti oha kwathelwa ashike kuunona wopuushinda ngele we mu sile ohenda opo wu mu etele omeya mokandini ko 2L.  Kansela gwoshikandjohogololo Johannes Elissa okwa li a lombwele Kundana kutya ina tseyithilwa ngele moshikandjohogololo omu na uupyakadhi wu li ngaaka, ihe ita vulu oku tya ko sha, omanga ina mona kutya uupyakadhi owa fa peni lela opo a ninge omalongekidho taga vulu oku ningwa po.
Caption: Omukulupe gwomimvo 100 Wilhemine Shevanyena nokatekulululwa Saara Haimbodi (4) otaya mono iihuna.