Nonande onkalo moshikukuta moKunene oya kala ya yaga komuntu, omasiku ngaka oshigwana moshitopolwa moka osha pepelelwa sho sha mono omata gwomvula ga kola okuza oshiwike sha zi ko. 

Aakalimo yomoshitopolwa moka oya ti, nonando otashi ka kwata ethimbo opo omwiidhi gu mene, otaya pandula oshoka komasiku gokomeho, mboka ya ka konga uulithilo otaya ka galuka komagumbo gawo.

Menasa Nangolo okwa ti, omvula oya loko nawa unene Etitano.

Aantu yamwe oya tauka mo moshitopolwa moka ya ka konga uulithilo hoka ku na omwiidhi omuhwepo.

“Otundji otwa kanitha iimuna oyindji kondjala, ihe nena otu uvite ombili komvula ndjoka ya loko nawa opo omwiidhi gu mene nawa,” ta ti ngaaka,

Ta ti, natango oye na omukumo kutya omvula otayi ya, oshoka aluhe ngele oya tameke okuloka lumwe ya dhiginina, ohayi ka tsikila okuloka uule wethimbo.

Nelombe Tashiya ngoka ha hingi pokati kOshakati nOpuwo okwa ti, omvula oya loka moshitopolwa moka, onkene omeya otaga tondoka momadhiya oshowo mominkulo dhopate.

“Tse mboka hatu hingi sigo omoondundu okufala ookasitoma dhetu pomagumbo ihatu thiki ko we, oshoka otwa londodhwa kutya omeya hoka ohaga kungulula po iihauto,” a popi ngaaka.

Opolisi moshitopowa shaKunene oya kumagidha aahingi yiihauto ya kale ya kotoka yo ya yande okuhinga momilonga dhomeya nenge kehe mpoka pena omeya nando omashona oshoka osha nika oshiponga .

Sha ikwatelela konkalo yombepo omvula natango otayi tsikile okuloka, unene kiitopolwa yokuuniingino-mbugantu momasiku twaatalela.