Victoria Kaapanda
ONGWEDIVA –Okavidio komulumentu gumwe a hokana omvula ya zi ko, oka etela oyendji omaipulo kutya okwe shi ende ngiini opo a hokane aakiintu yaali mongeleka.
Ashike shika osha opalekwa kuResmore Simon Nakamhela ngoka oye ta monika mokavidio moka eli pokati kaafuko ya zala oofeyi.
Nakamhela okwa ti ye ina hokana aakiintu yaali, ashike okwa hokana okakadhona okakwanambwiyu, napamuthigululwakalo oye na ayehe okuzala oofeyi.
Nakamhela okwa hokana Ndilokelwa Maria omukwanambwiyu naKalinasho Kredula omumvo gwa yi momasiku 16 sigo 17 gaAguste momukunda Omundudu moshitopolwa shaHangwena.
“Aakwanambwiyu ihaya topolwa, ihaya tongolwa. Ngele gumwe ta pewa sha ano ayehe owu na okuya pa, sho shoka haya zalekwa ya fathana,” Nakamhela ta ti ngaaka.
Nakamhela ta ti esiku ndyoka okwa li a thikama naakwana ayehe koalutali, ya zala oofeyi opo omukwanambwiyu gumwe a kale pamwe nomufuko –omukulukadhi gwe.
Ta hokololola ta ti komazimo gamwe omulumentu oha pulwa a lande oohema adhihe dhohango dhaakwanambwiyu opo e ya zaleke ayehe.
Nakamhela ngoka ta monika ta itheta omahodhi mokavidio okwa li a lombwele Kundana ta ti esiku ndyoka okwa li a pititha omahodhi omanga eli koalutali oshoka okw ali a dhingolokwa kengungo lyolwiimbo ndyoka oyendji yomuyo ya li aakwanezimo yahe. Ta ti okwa li a kwatwa komahwilili kutya, nani oku na ngaa ezimo omanga a mona iihuna monkalamwenyo ye ayihe.
“Onda li nda kuthwa po paakuluntu yandje omanga ndi na oomvula ndatu, netompelo kandi li shi sigo onena. Ashike kegumbo nda li nda k atekulwa kakwa li handi kotha oshoka okwa li he mono iihuna ngame ohe ningwa nyanya. Onda li nda tokola ndi ka konge aakuluntu yandje sho nda ningi oomvula11,” Nakamhela a popi ngaaka.
Ta ti he, kakwali e mu tambula ko. Okwa li a mono iihuna sigo a piti osikola ye. Ta ti nonande okwa li e shi enditha nawa mongundu yahugunina kapwa li pe na omuyambidhidhi, oku mu futila a ka tsikile kiiputudhilo yopombanda.
Nakamhela okwa li a tokola a ka konge iilonga mositola tayi ithawa Food Lovers Market moWalvis Bay, hoka a li a kutwa. Omuhona gwe sho a li a uvu ehokololo lye, omolwa uuwanawa wiilonga ye okwali e mu tumu koDubai hoka a ningi oomvula 9 ta longo ye tayi kosikola. Ngaashingeyi okuna onzapo yuulongelwe, odegree moSales and Market (Omalanditho).
Ta ti ehokololo lye ele, itali pu okuhokololwa mesiku limwe. Okwa li a lombwele Kundana kutya naye okwa valwa naakwana aakuluntu kuye, omumati nomukadhona. Esiku lyohango yomumwayinamati, omukwana ngoka a valwa nomuhomboli ye okwa li a zala a faafathana numufuko gwomukwana omukwao.
Pele Mwatunga gwoko NBC Kati FM, ngoka naye omukwana okwa ti esiku lyohango ye,
omukwanambwiyu naye okw ali a zala ngaashi naana ye. Ta ti shoka osha li sha ningwa opo ya kale ye li mombepo yimwe oshoka aakwanambwiyu ihaya tongolwa.
“Aakwanambwiyu aantu yamwe yi ihole unene shi vulithe aamwayinathana yowala. Nando ya kale yi ili kokule, pambepo oye li pamwe ashike. Pethimbo lyohango aakwanambwiyu ayehe ohaya pewa esimaneko limwe sigo ohango tayi pu,” Mwatunga a popi ngaaka.
Mwatunga sho a li a pulwa ngele aakwanambwiyu ohaya vulu okuhombolathana ngele inaya pambathana, okwati ke na natango uuyelele wa gana, ashike okwa ti okwa li a lombwelwa kutya oshinima shoka osha kala hashi tilika okuningwa oshoka pamwe otaya ka valathana sha pitilila.