Aakwanezimo otaya nipilathano omaako omolwa omahala gomapya, megumbo kwa li lyayinakulu a si ko nale, shika otashi ningwa momukunda Emono mOnayena, moshitopolwa shaShikoto. 
Aanona yomulumentu gumwe a valwa komukulupe mwene gwegumbo, ngoka anuwa a li e li thigulula po, konima yayina a hulitha oya ti kaya uvite ombili kwaashoka sha tokolwa kelelo lyaNdonga.

Egumbo ndyoka anuwa olyi li kedhina lyomumwayinakadhona gumwe,  eli pewa sho he a hulitha.
Hileni Kambangula okwa ti oya valwa ye li 11 kuhe, ihe ayehe oya kala megumbo moka kwa li lyahe, no kaye na we mpoka ye na okuya. Taya ti moka omo taya ithana kutya omegumbo.

“Megumbo muka otwa kala mo nale naakuluntu yetu, omo twa valelwa. Omvula ndjika omumwayina gwatate okwe ya a hala ehala mekoye muka, omanga a kala oomvula  odhindji koRundu nezimo lye naahoka oko kuna egumbo lye,“ Kambangula ta hokolola.
Ta pula ta ti, oshike ye na okupewa ehala mepya lyetu,  aamwameme oshowo aatekulu otaya ka ya peni ngele omahala otaga gandjwa po. Oya kala peni ethimbo alihe omanga aakuluntu ye li ko.

Kambangula ta pula kutya oshinima shika oye shi lopota kelelo lyaNdonga, ihe kaye shi mpoka sha hulile.
Ta ti, oya mono ashike omasiku ngaka aantu ye ya noopaala taya dhiki mekoye.
Gumwe gwomomalenga melelo lyaNdonga, ngoka a popiwa naye kuKunduna okwa koleke kutya oshipotha shoka osha lopotwa  kombelewa yawo.

“Aanona mboka okwa li ya tembuka mo megumbo moka taya kondjele, ya ka ninga egumbo lyawo limwe nahe, hoka ya li ya tameke okulanditha oopolota mepya lyawo, konima sho he a si, oko nee yazi ya galukile huka kwa valwa he,” Elenga lya ti ngaaka.
Ta ti, ayihe oya pwa nale. Otwa tokola oku ya topolela ayehe pokati, omahala ge thike pamwe.
Omupopiliko gwelelo lyOndonga Joseph Asino kakwa li ta monika okupitila pakwatathano lyopangodhi esiku ndyoka, opo a tye ko sha koshinima shika.