Aakwashigwana yaAngola ya pita po100, oya gongala pomatala gaShikango omanga yamwe ye li momapandaanda mOshikango taya kongo iilonga oshoka anuwa otaya si ondjala koshilongo shawo.

“Kutha ndje po ndike ku longele, nonando owa futu ndje iikulya opo ndi faalele aakwanezimo yandje koAngola oshoka otaya si ondjala,” gumwe osho a tondokele omutoolinkundana ta popi ngaaka.

Taya hokolola kutya, moNamibia oye ya mo kaashi li paveta oshoka ohaya tindilwa oompapila dhokupita, ashike kaye na nkene oshoka otaya si ondjala, otaya kongo uuhupilo.

Gumwe okwa lombwele Kundana kutya, pehala mpoka opo haya lala, oshoka itaya vulu okushuna koAngola inaaya mona iilonga.

“KoAngola otatu ka tala shike, ngele katu na sho tatu faalele ko, oku na ondjala. Oshihwepo tatu nyangadhala manga, pamwe Kalunga ta kwatha ngaa,” omulumentu ngoka inaa hala okupopya edhina lye, ta ti ngaaka.

Aantu mboka ohaya lala kohi yomuti, ya yala po iikutu ya wo. Aapolisi yaNamibia ohaye ya kwata, taye ya shuna koshilongo shawo, ihe ohaya galuka ko ashike natango.

Omukulukadhi gwoomvula dhopokati, e na okanona okashona okwa ti, shoka she ya kutha koshilongo shawo ondjala.

“Omvula inayi loka, iilya oya sa po komutenya, katu na nkene tu na okuninga. Okwa li hatu kambadhala okulanditha uukwashikependjewo momapandaanda, ihe paife iilandithomwa yetu ihayi landwa we.

Aangola mboka oya ti, otaya mono iihuna, otaya kongo iilonga yoludhi kehe.

Taya ti, nonando kaye na oshimaliwa sha ukilila okufutwa iilonga, shampa ashike taya mono sha shokulya.

Omukalelipo gwaAngola moNamibia omukuluntu Jovelina Imperial e Costa, ngoka a li e ya okutalela po nokukundathana uupyakadhi wu li poongamba dhaAngola naNamibia okwa ti, oye shi shi lela kutya ope na aantu yawo taya iyakele moNamibia kehe esiku kaashi li paveta ihe omolwondjala.

“Pethimbo ndika katu na nkene tu na okuninga, ihe omwedhi tagu ya otu na oshigongi oshinene pamwe nomukuluntu omunene gwopolisi yaNamibia opo tu ye tu kundathane uupyakadhi mboka nankene tu na oku u kandula po,” ta ti ngaaka.

Imperial e Costa okwa kumagidha aantu ye ta ti, naya hulithe po okwu iyakela moNamibia kaashi li pa veta oshoka otashi ya etele.

Ta ti, naya idhidhimike manga taya kandula po omaupyakadhi ngoka, yo naya simaneke oompango nomalandulathano agehe ga tulwa po.