Stefanus Nambara

NKURENKURU – Aalongisikola koSatotwa Primary School moshitopolwa shaKavango West oya ninga oomesiasa yonakanena sho taya longitha oonzo dhawo yene okupalutha aalongwa mboka ye li momuhandjo kosikola ndjika yi li momukunda, noya li yi na efaulo neikutho mo mosikola lyi li pombanda.

Osikola ndjika oya kala monakuziwa naanasikola haya fawula noku ikutha mo mosikola oshoka oyendji kaya li taya vulu okwiindhindhimiklia oshinano okuya nokuza kosikola. Olundji aanasikola ohaye ya kosikola inaaya makela nando osha.

“Otwa kala nuudhigu ngele tashi ya komwaalu gwaanasikola. Aalongwa oya kala nuupyakadhi woku ya kootundi oshoka ohaya zi komikunda dhokokule,” Klemens Mpande, omulongi ngoka a longa posikola ndjoka nopethimbo ya li yaa na omuhandjo ta ti ngaaka.

Mpnde ta ti shika osha li sha eta sigo oponkatu mpoka kuyele mo2016 ya tule po  omuhandjo, shoka sha li sha ningwa nekwathelo lyoshigwana.

Nando ongawo, omulongi ota ti opwa li pe na nenge pwaa na eyambidhidho komuhandjo okuza kaavali yamwe. Shika osha thindile aalongi ya ninge etokolo lyokuumba oshimaliwa komwedhi tashi zi miiyemo yawo opo ya kwathele uunona mboka wu li momuhandjo. Iimaliwa mbyoka hayi gongelwa ohayi vulu ashike okulanda iilikolomwa mbyoka ya limwa momudhingoloko ngaashi oomboga, omagadhi gokulya osho wo omakutu guusila wepungu shoka hashi ya thikitha komusilo gwomwedhi tagu landula ya umbe ishewe oshimaliwa.

Ta ti opograma yoshikukuta yepangelo ndjoka hayi gandjwa kaayelele noprograma yosikola yokupalutha aanona nadho ohadhi kwathele okupalutha aalongwa mboka ya za poluhepo. Mpande ta ti wo iikulya mbika yooprograma ndhika ohayi thiki kwa toka, omathimbo gamwe oshikako shi li nale mokati.
Sho omutoolinkundna nguka a thiki pomuhandjo, aalongwa yamwepo oya adhika taya li omwiha, taya li  oshimbombo sha tulwa miiyaha iyali iinene-shimwe oshaamati nashimwe oshaakadhona. Aalongi oya landa wo iilongitho yokuteleka momuhandjo. 

“Aalongi oya pondola wo okulanda omatalashe gaalongwa oshoka aavali yamwepo itaya vulu okulanda omatalashe,” ta ti ngaaka. Ashike omatalashe ngaka otaga ende taga kulupa nopwa pumbiwa omape.
Omukalekipo guundjolowele mosikola, Hertha Sikuvi oku na okulonga iilonga ya gwedhwa po kosikola ndjika yi na oonzo tadhi nyangwaanyangwa.

“Iilonga yandje posikola oyo omukalekipo guundjolowele ashike natango ohandi iyamba okukwathela komuhandjo. Iilonga yandje okukwathela aalongwa mokuteleka,” Sikuvi ta ti ngaaka. Omu na aalongwa 68 haya zi momuhandjo ngoka gwa dhikwa niiti.

-Stefanus Nambara omugandji guuyelele mUuministeli wOmauyelelo nOmakwatathano Gopaungomba moNkurenkuru moshitopolwa shaKavango West