Victoria Kaapanda

ONGWEDIVA-Aalongwa ye li 82 posikola Ouma Combined kaye na sha uuthemba woshilongo, ndhoka odha etwa puuyelele komukuluntusikola  posikola mpoka Micheal Shifiona.

“Uupyakadhi wuunona kawu na uuthemba woshilongo owa etwa komaudhigu ga yooloka. Ethimbo limwe gumwe paakuluntu yomunona ke na sha uuthemba, nenge aakuluntu kaye li mekwatathano ewanawa. Omukuluntu gumwe keshiwike mpoka e li nenge aakuluntu ya hula ko,” Shifiona ta ti ngaaka.
Shifiona ta ti shoka otashi ka etela aanona mboka monakuyiwa uuna taya ka mana oosikola dhawo, notaya ka hala okutsikila eyilongo lyawo kiiputudhilo yopombanda.

Uupyakadhi mboka owa kalitha po natango uunona okumona oshimaliwa shuunona wu li moluhepo oshowo oothigwa oshoka ngoka ke na uuthemba iha kwathelwa.

Ta popi ta ti okwa koneka kutya uupyakadhi mbuka owu li poosikola odhindji moshilongo, ihe oshihwepo ngele Uuministeli wIikwameni wu shi tule miilonga, noku uva ko omawupyakadhi guunona mboka wu vule okukwathelwa.

Shifiona ndhoka okwe dhi popi esiku osikola yawo ya li tayi patulula olusheno pambelewa, ndoka ya iyambelwa kehangano ta i ithanwa Ekikimbo Fishing (PTY LTD) ndoka lwa li lwa pula N$331 000 Etitano lya zi ko.

Omukuluntusikola ngoka okwa li a pandula ehangano ndyoka sho lya li lya kwathele osikola yawo yilonge nuupu. Ta ti osikola ndjoka oya ninga oomvula 43 kaayi na olusheno noya kala tayi longo nuudhigu.
Ouma Combined oyi li ookilimeta 20 oku za mOutapi, oyi na  aalongwa 368 naalongi 17. Osikola ndjoka oyi na oongundu okuza oshikunino sigo ongundu ontimugoyi.

Shifiona okwa li wo a totha mo omawupyakadhi natango ga taalela osikola ta ti, aalongwa yamwe natango ohaya longelwa kohi yuutala onkene oya pumbwa oongulu. Osikola oyi li wo mompumbwe yehala lyaalongi lyokuza oshowo oya hala osikola yi tulwe olugumbo lwondhalate.
Uundjugo wosikola kawu li monkalo ombwaanawa nokulongithwa kaalongwa nokaalongi, oya pumbwa wo natango ookompiyuta posikola dhaalongwa.