New Era Newspaper

New Era Epaper
Icon Collap
...
Home / Aalongwa ya galukile kosikola… Aavali natango oya thita po

Aalongwa ya galukile kosikola… Aavali natango oya thita po

2019-02-15  Staff Report 2

Aalongwa ya galukile kosikola… Aavali natango oya thita po

Victoria Kaapanda

Aalongwa yoposikola Oneeya  Combined School mOshitopolwa shaMusati oya galukila kosikola konima sho osikola ya ningile omasiku gaali ya patithwa kaavali, okuza Omaandaha  sigo Etitatu lyoshiwike shika.

Osikola ndjoka yi na oondondo okuza poshikunino sigo ondondo ontimugoyi oya li ya patithwa kaavali yaalongwa yondondo ontimulongo ndjoka ya li ya tembuldhwa po posikola Oneeya ya tembudhilwa kosikola Uushwa , ndjoka yi li oshinano shuule wookilometa 18  okuza posikola pOneeya.

Aavali moonkundathana nonzonkundaneki ndjika oya li ya popi kutya etompelo lyawo lyokupata osikola nokukelela aalongwa ayehe yoposikola mpono, ooshoka oye uvite olukeno lwuunona wawo wa falwa kosikola yi li kokule wo kau na omahala mpoka tau zi, navaali oya ka iyadha taya dhengele uupeleki opo ya gandje omahala kaanona mboka noya kala taya ithana omukuluntu gwelongo moshitopolwa shaMusati e ya popile ihe ina thika mbala noya li ya tokola okukaleka aanona komagumbo.

“Aanona yetu oya li ya udhithila koosikola dhimwe dhi ili, ihe oya ka iyadha ayehe ya taambwa ashike kosikola yimwe ndjoka kUushwa. Ano uunona awuhe inau shi enditha nawa nenge ongiini? Omanga ndi shi mboka we shi enditha nawa ihe inau taambwa koosikola dhilwe dhi li hwepo dhi vule Uushwa Combined School.” Omuvali gumwe ta ti ngaaaka.

Ta gwedha po ta ti epangelo inali ya yalula nando, oshoka  oya tokola ashike hoka ye li inaya pula oonkundathana naavali, oshinima shoka ye wete kutya otashi vulu okutula uunona wawo muupyakadhi.

Omulongisikola gumwe goposikola Oneeya ngoka a tseyika koshifokundaneki shika okwa popi kutya oku uvite nayi epangelo lya kutha po  ondondo ontimulongo posikola yawo  ye yi  fala kUushwa, omanga iizemo yawo hayi kala iihwepo yi vule yosikola ndjoka kwa falwa ondondo ontimulongo, ndjoka tayi monitha uunona wa zi posikola  Oneeya iihuna.

Omukuluntu gwelongo moshitopolwa shaMusati Laban Shapange okwa li a popi kutya aalongi mboka ye na okulonga iilongwa yomongundu ontimulongo posikola Oneeya kaye po, nuuministeli welongo kau na oshimaliwa okukuta aalongi aape onkene oya li ya thiminikwa okufalwa kosikola hoka ku na  aalongi yiilongwa mbyoka.

Aalongwa ya piti ye li omi-30 oya li ya twambwa kosikola ndjoka Uushwa, mwa kwatelwa aalongwa yokoosikola ngaashi Onkambadhala, Oneeya, Oshindete oshowo Naiti Combined School.       


2019-02-15  Staff Report 2

Tags: Omusati
Share on social media