Aalongwa oya kumagidhwa ya gwanithe po omalandulathano noompango adhihe poosikola, okukeelela omukithi gwoCovid -19, okuza esiku lyotango kosikola.
Minista guundjolowele nonkalonawa Kalumbi Shangula momushangwa gwontseyithipititho, kombinga yomukithi gwoCovid-19 okwa ti, aalongwa naya iyuthe koompango adhihe dha tulwa po.
“Aalongwa naya kale taya iyogo koonyala ethimbo alihe, naya kale ya zala uumasika nokulongitha ikeelelitho ayihe okukeelela omukithi ngoka,” Shangula a popi ngaaka.
Okwa gwedha po ta ti, omukithi ngoka ohagu taandele mbala momahala gwomangundumano, ngaashi naana mokati kaalongwa, onkene kehe okanona oka pumbwa okwiisila oshimpwiyu kokene kehe ethimbo.
Ta kumagidha aanona kaaya kwatathane komalutu oshowo okwiikwataakwata moshipala.
Minista natango okwa kumagidha aalongi ya kaleke po elandulathano lyokupititha po omahala pokati komulongwa nomulongwa.
Shangula ta ti, omukithi gwocorona ngoka gwa ponokele oshilongo shika omumvo gwa yi, nogwa faalele oomwenyo dhAanamibia 319 sigo onena, inagu tya po hwepo natango.
Ohela Kundana okwa tsakaneke aalongwa yokoosikola dha yooloka, taya ende ya uka koosikola dhawo, taya ulike ya ndjangumukwa no yu uvite ombili sho taya ka tameka omanongelo gawo.
Omulongwa gwoposikola pEhenye Primary mOshakati, e li mondondo ontine, okwa lombwele Kundana ta ti, oku uvite nawa sho ta ka tameke osikola.
“Ondu uvite nawa oshoka omumvo gwa yi okwa li twa ningi ethimbo tu li pevi notwa li twa pitililwa po koshindji, uuwanawa wosikola inatu wu mona omolwomukithi gwoCovid-19 ngoka gwe ya muuyuni awuhe,” Tuendele a popi ngaaka.
Okwa gwedha po ta ti, ota kumagidha aalongwa aakwawo ya tsikile okulesha omambo gawo oshowo okusimaneka omalombwelo gaakuluntu yawo, nkene ye na okwikeelela komukithi gwoCovid-19.
Tuendele okwa ti, oku uvite ko oshiponga nuupyakadhi womukithi ngoka, onkene itaka pitika omulongwa omukwawo akonde oompango nomalandulathano inemu pukulula nenge emulopote komulongi gwe.
“Sho nda kala mefudho onda kala handi tala otv nokupulakena oradio nkene aantu yakala taya kumagidhwa, okwiigamena komukithi gwocorona oshowo okunkondopaleka akwiita yolutu,” Tuendele a popi ngaaka.