Victoria Kaapanda 

ONGWEDIVA –Aalumentu ye li yaali oya li ya mangwa po mOlyomakaya ya zi ko, sho ya li ya kwatwa nomahooli goomiihauto ngoka ya li ye ga yakele moshilongo okuza koAngola, mOlukanda Okangwena mOndangwa.

Omugandjimulombo gwopolisi yaShana Thomas Aiyambo okwa ti , oshiningwanima shoka osha li sha holoka potundi 17h00 yokomatango, mOshitopolwa shaShana.

“Aalumentu mboka oya li yatatu noya li ya monika taya helula omandini ge na omahooli gomiihauto ngoka ga zi koAngola, taye ga tutile megumbo limwe lyi li molukanda Okangwena. Yo taya tutile omandini ngoka gaa na sha mohauto yoToyota Legend 45,” Aiyambo ta ti ngaaka.

Aiyambo ta ti aalumentu mbaka yaali oya li ya kwatwa ketanga lyaakwiita konima sho ya li ya li ongaku nokuthiga po ohauto yawo, sho ya li ya mono aakwiita. Omulumentu ngoka omutitatu kakwa li a kwatwa nonando otaku tiwa okushiweke nawa.

Pahokololo lyopolisi oy ali ya adhika niimaliwa koomuma yi li N$3 274, nomandini ogendji gamwe oge na omahooli go gamwe kage na sha.

Iiwike iyali ya pita, omandini gomahooli ge li 70 oga li ga kwatwa po kopolisi yaNdangwa, ge thike poolita dhi li 1 635 kumwe agehe, noge na ongushu yoshimaliwa N$22 300.

Aiyambo okwa ti aakwashigwana oya londodhwa kaaya yakele we omahooli moshilongo, oshoka inaga pitikwa okuya moshilongo go oga nika oshiponga kiihauto oshoka inaga dhindwa nawa oshowo oga nika oshiponga okupungulwa momagumbo.