New Era Newspaper

New Era Epaper
Icon Collap
...
Home / Aanadholongo mOshakati anuwa inaya gamenwa koCovid-19

Aanadholongo mOshakati anuwa inaya gamenwa koCovid-19

2021-07-14  Victoria Kaapanda

Aanadholongo mOshakati anuwa inaya gamenwa koCovid-19

Gumwe kwali gomaanadholongo ngoka edhina lye lyi shiwike kuKundana ota nyenyeta kutya, aanadholonga oye li muupyakadhi woCovid-19 oshoka omwaalu gwaantu taya kwatwa ogu uka pombanda. “Mondholongo ihamu tsininwa, nonando mboka ya kwatwa ohaya falwa owala kiipangelo, omukithi natango omo guli,” ta ti ngaaka.

Omulumentu ngoka ta ti, opo a mangululwa modholongo okwa ti, modholongo yaShakati omu na
ocorona, ngele owa yi mo nena omuna ashike aantu taya kolola yo ye na omashikisha.

“Ha atuhe ha tu yi modholongo twa yona, yamwe oya lundilwa nenge taya fekelwa, onkene aanadholongo oya pumbwa okusilwa oshipwiyu,” ta nyenyeta ngaaka. Ta pula kutya omolwashike odholongo itaa yi tsininwa nenge oosela dhoka dhi na mboka ya monika ocorona itaa dhi tsininwa.

 Ta popi ta ti shoka otashi ulike kutya  ka pe na ngoka e na ko nasha.

Ta gwedha po ta ti, ocorona otayi taandele mbala modholongo oshoka aantu ohaya lala pamwe no haya tsakanene kundjugo nokekulo kape na egameno. “Ocorona natango ohayi etwamo kaantu mboka taya mangwa okuza kondje, oshoka ngele ya mangwa ohaya tulwa ashike mumwe naamboka yeli nale meni, yo inaaya konaakonwa ngele oye na ocorona,” ta popi ngaaka.

Ta ti, mboka taya zi pondje naya itulilwe, no ngele a ningilwa omakonaakono opo nee taya tulwa mumwe naya kwawo.

“Onda hala okuthinda omuthindo kutya, aapolisi naya ndhindhilike kutya, haantu ayehe yeli modholongo ye na ondjo, onkene naya hulithe po ombepo yokwaanakonasha,” ta ti ngaaka.

Omulumentu ngoka natango okwa nyenyeta kombinga yiipotha tayi undulilwa komeho iikando oyindji.

“Uuministeli wuuyuki owa pumbwa oku indhopa noku konakona uupyakadhi wuli mompangulilo yaShakati,” ta popi ngaaka. Ta ti, iipotha ohayi undulilwa komeho unene, kaape na omatompelo gongushu.  “Ohatu kala twa lundilwa twa hala okupangulwa, tu manguluke opo tu shune kiilonga yetu noko magumbo,’’ ta nyenyeta.

Omupoliko gwopolisi moshitopolwa shaShana Thomas Aiyambo okwa ti, modholongo yaShakati omwa monika ashike omuntu gumwe, e na omukithi goCovid-19. “Omuntu ngoka okwali a konakonwa nongaashingeyi okwi ikalekelwa, omanga ta ti po hwepo. Kehe ngoka e na uunkundi wo ntumba oha falwa koshipangelo mbala,” ta yelitha ngaaka.


2021-07-14  Victoria Kaapanda

Share on social media