Ngoloneya gwoshitopolwa shaShana Elia Irimari okwa kumagidhha aanafaalama kUulunga waKolondo moshikandjohogololo shaKatyali, ya gandje ompito kaakwiita yetanga lyegameno ya ninge omadhewo go ku umba.
“Out uvite ko kutya ehala ndika ohamu lyi longitha onga ehala lyuulithilo, ihe otatu indile mu gandje ompito kaakwiita ya idheule oku umba oondjembo uule woomwedhi ndatu, sigo tamu ka lombwela mu galuke,” Ngoloneya ta indile aanafaalama.
Ta ti, aanafalama naya tembukile pakathimbo komahala hoka ye wete kutya oku na uulithilo uuwanawa, omanga mpaka tapu longithwa pethimbo ndika.
Omadhewo gwokuumba oondjembo ohaga ningwa ashike lumwe konima yomimvo ntano.
Irimari okwa kumagidha wo natango mboka ye na po omandoloma gomeya opo ye ga lundulule po manga.
Ehala Uulunga waKolondo olya li lya ningi lyepangelo mo1995, nolya talika ko olyo ehala ewanawa lyuulithilo unene kaakalimo yomoshitopolwa Oshana oshowo Oshikoto.
“Elalakano kalyi shi lyokutidha aanafalama, ihe olyokugandja ashike ompito opo aakwiita ya idheule ya manguluka oshowo okuyanda iiponga yombaadhilila,” ta fatulula ngaaka.
Omukuluntu gwomadhewo metanga lyegameno Ndengu Nambahu okwa popi ta ti, omadhewo ngoka ihaga ningwa kehe omumvo ihe ohaga ningwa ashike konima yomimvo ntano.
“Oomwedhi ndatu dha piti, otwa kala nokukumagidha aanafaalama ya tembuke pakathimbo, opo tu vule okutameka omadhewo getu. Okwa li twa tengeneke omadhewo ga tameke petameko lyomwedhi nguka,” ta popi ngaaka.
Nambahu ta ti, omadhewo otaga ka tameka momasiku 25 gaSeptemba notaga ka hula muNovemba nuumvo.
“Otatu kumagidha aanafaalama ya kale ya mana okutembuka, omanga omasiku 25 inaaga thika,” ta kumagidha ngaaka.
Ta gwedha po ta ti, elalakano lyokudheula aakwiita, oku ya longa nkene ye na okulongitha iilwitho okugamena oshilongo oshowo okukala ya dheuka.
Nambahu ta ti, konima omadhewo ga pu, otaya ka ninga omapekaapeko, opo ya kwashilipaleke ngele aanafaalama otaya vulu okugalukila kehala lyawo lyuulithilo.
Nonando aanafaalama ya li ya kumagidhwa ngaaka, oya li wo ya pula kutya oye na okuya kombinga yinipo hoka ku na uulithilo uuwanawa.
Natango okwa li ya ningi omayindilo gwokukwathelwa niiyenditho okutembudha iinima yawo.