Omukainhu weedula 35 okwa fya eshi e limangelekela mokandjuwo meumbo lavo modoolopa yaWalvis Bay Osoondaxa mokati koufiku potundi 01h00.
Nakufya okwa tongolwa oye Angela Van Wyk omukalimo womoWalvis Bay.
Omupopiliko wopolifi moshitukulwa Erongo Inspekta Ileni Shapumba okwa hokolola ta ti omukainhu okwe limangeleka nomwiya wombidja yaye efimbo kwa li omushamane waye a kofa.
Opolifi oya ti Van Wyk ina fiya po omukanda tau yandje ouyelele kombinga yefyo laye.
Olutu laye ola twalwa koshipangelo shaWalvis Bay opo li ka ningilwe omakonakono. Ovakwapata vaye ova shivifilwa efyo laye nomakonakono opolifi otaa twikile.
Lwopokati opo opolifi oya koleka efyo lomulumenhu weedula 46 a fya eshi a lyatwa kotuwa Olomakaya mokati koufiku potundi 02h00 modoolopa yaWalvis Bay.
Opolifi oya hokolola tai ti omulumenhu okwa li ta tauluka opate eshi kwa dja otuwa yoToyata ndele tai mu lyata.
Nakufya oo a li a mona oshiponga komutwe okwa twalwa koshipangelo shepangelo shaWalvis Bay, oko a xulifala konima yefimbo lixupi eshi a fika moshipangelo.
Opolifi oya ti ovakwapata vaye ina va shivifilwa natango efyo laye.
Omakonakono opolifi otaa twaikile.