New Era Newspaper

New Era Epaper
Icon Collap
...
Home / Aanamapya taya imemeha komuloka

Aanamapya taya imemeha komuloka

2021-03-17  Victoria Immanuel

Aanamapya taya imemeha komuloka

Ooyene yomapya miitopolwa oyindji yomonooli, oya penduka noondigolo taya hambelele Pamba, omolwomulokwa omwaanawa.

Selma Petrus gwomukunda Ehafo lyaKandenge moshitopolwa shaShana okwa ti oya pandula komvula ndjoka ya loko omasiku gaali ga landulathana.

“Iilya yetu okwa li tayi si po. Okwa li twa hupula kutya omvula itayi loko we, nonando pwa kala ngaa mba ye na omukomo kutya omvula otayi ka loka oshoka ethimbo lyomvula inali pita natango,” ta  popi ngaaka.

Ta ti, ngeno okwa li iilya  yawo inaayi mona omata gomvula, ngeno momapya gawo inamu za nando oshilya shimwe, ihe nena oya tula ko nale oomuma.

“Omagumbo gamwe momukunda gwetu ngoka kwa li ga longo omapya gawo tango, oga kanitha oshindji. Iilya yawo oya sa po thiluthilu nomvula ndjika ya loko itayi yi yumuna nando,” Iipinge ta ti ngaaka.

Iipinge ta tanga epya lye ta ti, oku na omina. “Uuyamba wa thiki wo pungame, sho kwa li nda pumbwa omvula ashike. Ondi na omakunde, oofukwa, iitila, omanuwa nomatanga oshowo omapungu mepya lyandje,” ta popi, ye ta imemeha mo.

Omvula oya tsikile okuloka nawa kiitopolwa ya yooloka monooli.

Oshitopolwa shaHangwena osha lokwa nawa omasiku gaali ga piti.  

Nonando yamwe taya pandula omuloka omwaanawa, yamwe otaya ti omvula oya loko ya dhiginina unene.

Maria Neweka momukunda Uukwangula okwa ti, omvula oya loko okupendukila ohela noya uhala tayi loko.

“Otwa pandula shili, ihe omvula oyindji unene, iilya oya sa po nale komutenya, inayi pumbwa  omvula oyindji,” Newaka a popi ngaaka.

Omvula oya loko nawa niishana oya talama omeya. 

Aakalimo yomOshikuku oya ti, omvula oya loko nawa  momudhingoloko gwawo.

Niita Kandjengo e li kOmuthiya okwa ti, omvula kuyo inayi thika ko nando.

“Omvula otu yi uvitile ashike kuuninginino, omapya getu oga kukuta wala natango. Omanga omvula ya loko kiitopolwa yimwe yokuuninginino, natse otu na omukumo kutya otatu lokwa momasiku tage ya.” 

Caption : Omvula oya loko nawa miitopowa oyindji yokonooli okuza mehuliloshiwike.


2021-03-17  Victoria Immanuel

Share on social media