New Era Newspaper

New Era Epaper
Icon Collap
...
Home / Aanandholongo mOkahao taya nyenyeta oku iyakula uuyaha wokulila

Aanandholongo mOkahao taya nyenyeta oku iyakula uuyaha wokulila

2021-03-09  Victoria Kaapanda

Aanandholongo mOkahao taya nyenyeta oku iyakula uuyaha wokulila

Aanandholongo mondjedhililo yaKahao moshitopolwa shaMusati anuwa otaya si ondjala, nomalandulathano gokukeelela etaandelo lyomukithi gwocorona itaga landulwa. Gumwe ngoka edhina lye lyi shiwike kuKundana okwa ti, aanandholongo ye li omulongo ohaya taambathana okayaha kamwe, ngele gumwe a mana okulya, ta gandja kugumwe natango e ka longithe  oshoka uuyaha inawu gwana.

“Omukithi gwoCovid-19 otagu keelelwa ngiini, ngele aantu otaya taambathana iilongithomwa. Aanandholongo inaya pitikwa okweetelwa iilongithomwa kaakwanezimo yawo, omanga epangelo itali yambidhidha aanandholongo nasha,” ta popi ngaaka.

Ta ti, hakehe gumwe e li mondholongo a yona nenge e na ondjo, yamwe oye li mo, ihe aayuki. Ta ti aantu ye li mondjedhililo nayo naya silwe oshimpwiyu ngaashi aantu ayehe.

Ta gwedha po ta ti, aanadholongo ohaya pewa okulya lumwe  mesiku, kaye na oothewa, ootoileta, ihe epangelo inali hala aakwanezimo ya faalele aapambele yawo.

Omukuluntu gwopolisi moshitopolwa shaMusati Titus Shikongo okwa ti, nonando shoka tashi nyenyetwa kombinga yuuyaha osho shi li, oompango nomalandulathano mondjedhililo ohaga gwanithwa po.

“Uuyaha wokulila omo wa li wa gwana, ihe aanandholongo oyo yene ye wu yonagula po. Uuyaha mboka haya taambathana ohawu yogwa nomeya omapyu nothewa omanga inaawu longithwa kugumwe olutiyali,” Shikongo a fatulula. Ta ti, oye li metifa okulongekidha natango uuyaha, opo kehe gumwe a kale ta longitha okayaha ke, oye awike. “Ka shi shi shoshili kutya otaya si ondjala, iikulya omo yi li ya gwana, shapo otaya ti, ihaya pewa iikulya mbyoka ya hala, ihe shoka inashi pitikwa,” ta ti ngaaka.

Shikongo okwa ti, iikulya tayi etwa kaakwanezimo ohayi pitikwa, ihe ohayi hadhwa tango oshoka ohaya holeke mo iinima yawo, okupititha opo yi ye meni.

Maria Shigwedha gwomOshakati okwa ti, oshiwike sha zi ko okwa li a yi kopolisi yaKahao a ka talele po mumwayinamati ngoka a ningi oomwedhi ndatu mondholongo, ihe kakwa li a pitikwa e mu mone.

“Onduuvite ko kutya oku na ocorona, ihe oshike itaaya taamba iikulya noothewa, opo ye yi gandje yoyene. Ngele inaya hala okutaamba iikulya mbyoka twa teleka, oshike itaaya taamba mbyoka ya zi moositola,” ta pula?

Shigwedha ta ti, epangelo nali kwathele aanandholongo oshoka inali hala okutaamba shoka tashi falwa okuza kondje.

“Onda shuna niinima yandje ayihe  kwa li nda fala esiku ndyoka Onda hepeke iimaliwa yandje okuya kOkahao, ihe inandi mona ko ekwatho,” a popi ngaaka.


2021-03-09  Victoria Kaapanda

Share on social media