WINDHOEK-Minista yomidhingoloko nomatalelopo Pohamba Shifeta okwa hokolola kutya okukwata ashike ookalyamupombo mboka haya tumwa ya ye muukongo wiiyakuti ya gamenwa  omanga etindi ndyoka hali ya tumu inali mangwa nena itashi kwathele mokushunitha iimbuluma pevi.

Minista okwa li ta popi pethimbo lyoshigongiilonga shaanambelewa yomudhingoloko noshowo oombelewa dhimwe ndhoka woo dhi na mo olunyala mokulwitha iimbuluma koshi yuuministeli mboka moWindhoek mEtitato lya zi ko.

Okwa hokolola kutya nonande aapolisi noshowo etanga lyegameno ndyoka lyi li tali tonatele omahala giinamwenyo, aakongo inaya pitikwa  okukonga iinamwenyo niithitukuti ya gamenwa ohaya longo nuudhiginini okukala ya tula aakongo mboka konima yekumba onkene ngaa e lwete sha simana okukala pwa ningwa omakonaakono gomuule.

“Ngele opwa ningwa omakonaakono gomuule ndele aanangeshefa yomeni naamboka yokondje yoshilongo mboka haya tumu aantu mboka yowala taya monika ano shoka otashi ka shunitha iimbuluma pevi,” osho Shifeta a lombwele aanambelewa ya yooloka ngaaka moshilandopangelo.

Minista okwa hokolola kutya ngele mboka haya tumwa oyo ashike taya yi konima yomakumba nena mboka sho taya kwatwa yo aatumi otaya kongo po ishewe aantu yamwe mboka taya tsikile niilonga mbyoka omanga yakwawo ye li mondholongo nongeshefa otayi tsikile.

Nguka okw ali woo a popi kutya osha pumbiwa okuya po noompango oompe ndhoka tadhi kala dha kindji notadhi vulu okukwathela mokulwitha iimbuluma mbika sigo oketindi lyawo kutya nee aanangeshefa yomeni lyoshilongo nenge oomboka yokondje mboka oyo ye lile uukongo mbuka komeho .

Okwa hokolola woo kutya uuministeli ngashingeyi otawu ka sa oshipwiyu okushanga omafo ngoka ge na omusholondondo gwiinamwenyo mbyoka ya gamenwa opo kehe ngoka ta ka adhika nomiinga, omayego noshowo oshipa shoshinamwenyo shoka nena oku shis hi kutya oku li kondje yoveta na oteke wu toola mo.

Shifeta okwa ti ngashiingeyi ope na aantu mboka haya kwatwa niipa ngaashi yoongaka ashike omuntu sho ta pulwa kutya oku shi nine shike ke shi shi kutya oshinamwenyo shoka osha gamenwa na inashi pumbiwa okudhipagwa.

 “Ngoka  ogamwe gomomashongo aanambelewa yetu yokoshikondo shoka ya taalela nomathimbo gamwe otashi etitha nokuli iipotha yoludhi ndoka yi ekelwehi, ye omuntu ta shuna moshigwana ta ka longa natango oshimbuluma sha faathana,” osho a hokolola ngaaka.

Ashike okwa ti ngashiingeyi uuministeli otawu ningi onkambadhala okulonga kehe shoka taya vulu shoka tashi vulu okushunitha iimbuluma moshikondo shoka pevi noshowo okugamena iiyamakuti mbyoka meendelelo ngaashi tashi vulika.

Okwa dhenge woo omuthindo mwaashoka kutya egandjo lyombooloha kaadhipagi yiimuna ya gamenwa nasho otashi indjipaleke iipotha mbyoka oshoka mboka ya pewa ombooloha oyo ngaa taya shuna moshigwana oku ka longa iimbuluma mbyoka.