New Era Newspaper

New Era Epaper
Icon Collap
...
Home / Aanangeshefa yowinawina naya simanekwe- Geingob

Aanangeshefa yowinawina naya simanekwe- Geingob

2019-06-28  Loide Jason

Aanangeshefa yowinawina naya simanekwe- Geingob

WINDHOEK-Omupresidente Hage Geingob okwa ti kutya aanangeshefa yowinawina ngaashi Alberto Baillerers ngoka ngashingeyi oye ta landa po Erindi naya simanekwe oshoka oyo haya eta po oompito dhiilonga moshilongo.

Ndhika omutse gwoshilongo okwe dhi popi ongula yEtitatu lyoshiwike shika pethimbo ndyoka Baillerers a talele po egumbo lyepangelo moshilandopangelo.

Nonande ehuku lyoshigongalele shika inali uvika kaatoolinkundana mboka ya li kegumbo lyepangelo pethimbo ndyoka oshoka ayihe oya popilwa konima yomiyelo dha pata, Geingob okwa popitha aatoolinkundana kutya oshipotha shErindi shoka sha li shili mompangulilo osha kuthwa mo.
“Erindi olya kala nale momake gaakwiilongo onkene kape na natango oveta moshilongo ndjoka tayi ulike kutya aakwiilongo mboka ye na omavi moshilongo inaye ga landitha po. 

Onkene tse onga epangelo otwa ninga onkambadhala opo tu lande po ofaalama ndjoka ihe otwa mona kutya nani ofaalama ndjoka oyi li nale momake gaakwiilongo noya landithwa po nale,” osho a hokolola ngaaka.
Okwa tsikileko ta ti kutya sho nduno epangelo lya mono uuyelele mboka olya tokola opo lyi kuthe mo oshipotha shoka mompangulilo lyo lyi wape okuhokolola mbyoka kondje yompangu ya tse kumwe nawa, naashoka osho she ya sigo oompoka omunangeshefa nguka gwoshipuna a tsakanene nomupresidente.

Hage nonande ina gandja ompito kaatoolinkundana ya ye moonkundathana noshipuna shika okwa hokolola kutya na pewe esimaneko oshoka aakalimo oyendji otaya ka mona iilonga ngele ndika lya yi miilonga.
“Omu li po tamu ti kutya moshilongo kamu na oompito dhiilonga ashike ngashiingeyi inamu hala okugandja esimaneko kaanangeshefa mbaka. 

Aanangeshefa mbaka oye na oompito odhindji dhokutota oompito dhiilonga, ngele ya mono omahala. 
Onkene kehe nguka a holoka nena otashi vulika a kale woo a mona ompito yimwe yuungeshefelo ndjoka woo tayi vulu okutota po oompito dhiilonga dhi li nawa nodha uka.” Ta tsu omuthindo ngaaka.

Geingob okwa li woo a lombwele aatoolinkundana kutya aanangeshefa oye li poondondo dha yooloka, pu na mboka yasimana unene, naamboka ya simana.

“Ongaashi ashike ngame naatoolinkundana, aatoolinkundana oya simana unene pungame oshoka oye na oonkondo dhopena, shika oshiholelwa showinawina,” osho a hokolola ngaaka.


2019-06-28  Loide Jason

Tags: Khomas
Share on social media