New Era Newspaper

New Era Epaper
Icon Collap
...
Home / Aanawa ya mono olusheno

Aanawa ya mono olusheno

2020-10-19  Victoria Immanuel

Aanawa ya mono olusheno

Ondhoolopa yaShakati, melongelokume nepangelo, oya gandja olusheno kaakalimo yomolukanda Onawa.
Oshimaliwa shoomilliona N$11 osha longithwa oku andjaneka olusheno mOnawa, osha kwatela mo oomilliona N$6 odha zi kuMinisteli weyambulepo lyiitopolwa noondoolopa.  Dhoka odha popiwa kuMinista goshikando shoka Erastus Uutoni, sho kwali apatulula olusheno ndoka pambelewa ko Extension 4, 5 oshowo 6. “Oshigwana otashi nyenyeta kutya epangelo itali longo, ihe oshili epangelo otali longo noonkondo oshilongo ashihe, okupitila miikando ya yooloka,” Uutoni ta ti ngaaka. Uutoni esiku ndyoka okwa pandula elelO lyondoolopa yaShakati, sho lya longele aakalimo yalo neitulomo.

Ta ti, ondoolopa ndjoka otayi monika nawa, nomalelo goondoolopa galwe naga kutheko oshiholelwa oshiwa nawa.
Ta popi ta ti, ndika ethano ewanawa noonkondo, noyendji mboka ka ka kwali yena omahala gawo yo yene, oye na,  nehala kehe olyina iinima ayihe tayi vulu okuya kwatha okulonga iilonga yimwe opo ya mono uuhupilo. Minista okwa ti, okwali a yelithilwa kutya  Onawa oyina omahala geli  3000  ga nuninwa aantu mboka taya tembudhwa  komalukanda mOshakati.

Äakalimo mbaka oonkalamwenyo dhawo odha ningwa ohwepo, omeya nomalusheno oya pewa. “Otandi yelithile oshigwana nasho shikale shina oshinakugwanithwa sho kufuta wo iifuta yo komwedhi, oku yambidhidha natango elelo lyondoolopa lyihume komeho,”Uutoni a popi ngaaka. Ngoloneya gwoshitopolwa shaShana Elia Irimari esiku ndyoka okwa ti, monakuyiwa Oshakati itashi ka kala we shina omalukanda kaageli pamuthika. “Pethimbo ndika olukanda lwaPohamba nalo olu li metifa okulongwa, okutulwa pondondo yimwe nOnawa,” Irimari ta ti ngaka. Ta gwedha po ta ti, omalukando ngaashi omalukanda ngaashi Oneshila, Kandjengedi, Oshoopala oshowo Uupindi na go oga thanekwa okuhumithwa komeho.

Irimari ta ti, shoka shina oshilonga okuyambulapo oonkalamwenyo dhaa mboka ye li monkalo tayi yemateke, ya kale wo momidhingoloko tadhi hokitha no dhina iinima ayihe. Ngoloneya okwa pandula aanilonga yali ya pewa iilonga mbyoka ye dhina Consulting Services Afrika oshowo ETN Technical Services cc. 


2020-10-19  Victoria Immanuel

Tags: Khomas
Share on social media