New Era Newspaper

New Era Epaper
Icon Collap
...
Home / Aaniilonga yoLewis ye vule 62 taya ka kanitha iilonga momasiku twa taalela

Aaniilonga yoLewis ye vule 62 taya ka kanitha iilonga momasiku twa taalela

2022-05-12  Victoria Kaapanda

Aaniilonga yoLewis ye vule 62 taya ka kanitha iilonga momasiku twa taalela
Top of a Page

Aaniilonga mositola yiiyakulwa yomomagumbo Lewis Store moNamibia anuwa oya tegelela okuthiga po iilonga yawo oshoka inaya gwanitha po oshimaliwa haya tengenekelwa yeshi gwanithe omwedhi kehe.

Aaniilonga mboka okwa li ya tseyithile oshifokundaneki shika kutya oya li ya pewa ombaapila yi na omwaalu gwaantu mboka taya ka thiga po iilonga.

Omuniilonga gumwe gomositola Lewis monooli ngoka edhina lye inaa hala lyi tumbulwe omolwokwiigamena okwa ti, oye li miilonga taya pi.

“Iilonga yetu otayi tu themenene kongudhi, otatu kondjithwa tu thige po oompito dhetu dhiilonga tadhi kalelele, tu kale aaniilonga yokondje yositola oshoka anuwa itatu gwanitha oshimaliwa hatu tengenekelwa tu gwanithe komwedhi kehe,” ta nyenyeta ngaaka.

Ta ti, oshimaliwa shoka hatu lombwelwa tu gwanithe oshi li pombanda unene, pethimbo ndika lyeliko lya gwa pevi.

“Ookasitoma itadhi ende we ngaashi kwa li hadhi landa nale, otatu kondjo okukonga ookasitoma, ihe kadhi po. Nena natu thiminike ookasitoma dhi lande nonando kadhi na iimaliwa?” ta pula.

Ta popi ta ti, otaya mono iihuna.

Taya indile omulandu gwiilonga yawo gu ete po elundululuko, ya shunithe pevi oopelesenda ndhoka dhi na okugwanithwa, okuza koopelesenda 90 okuya koopelesenda 50 nenge 70 ngele odhindji.

Omuniilonga gumwe okwa fatulula kutya, ngaashingeyi aaniilonga ye li 29 oye li komulilo omutiliugane, ngele inaya gwanitha oshimaliwa shoka shokomwedhi omwedhi nguka, nayo otaya ka gwedha yakwawo mboka ye li metifa okuthiga po iilonga.

“Otashi tu limbililike oshoka, Lewis onkene ta tsikile okupatulula iitayi iipe moNamibia alihe, hoka aluhe haku kutilwa aaniilonga aape, omanga meesitola tu li mo tu udha mo, sho shoka itaatu landitha tu gwanithe oshimaliwa oshoka otundji mositola yimwe,” ta hokolola ngaaka.

Ta pula kutya, oshike oositola ndhoka iihadhi kutilwa aaniilonga taya zi moositola moka mu na nale aantu oyendji, opo ya shonopale yo ya vule okulanditha nawa.

Aanilonga mboka natango otaya nyenyeta kutya kaye na esiku ya yelwa yelwa, ihe omahala giilonga ohaga gandjwa ashike kookuume yaakuluntuwiliki miilonga.

Omukuluntu gokukondolola oositola dhoLewis miitopolwa yokonooli Jacks Kandjoromba ngoka taku  hokololwa oye ta thiminike aaniilonga ya thige po omahala gawo ya ninge aaniilonga yokondje yoositola, sho kwa li a pulwa opo a tye ko sha, okwa li a tindi.

“Ngame omuniilonga ashike nda fa aaniilonga ayehe, onkene itandi vulu okutidha nenge okukuta aaniilonga, uuyelele awuhe wu pula koombelewa oonene dhoLewis kOvenduka,” ta yamukula ngaaka.

Omunambelewa omukuluntu mombelewa yi na sha naaniilonga yoLewis kOvenduka Sammy Jansen naye okwa li a tindi okuyamukulo omapulo agehe a li a pulwa esiku ndyoka.

“Kandi na uuthemba okupopya niikundaneki, ashike shoka tandi vulu okuyamukula ooshoka kutya ayihe mbyoka tayi popiwa kayi shi yoshili,” ta ti ngaaka.

Jansen okwa ti, kuuyelele awuhe wa gwedha po, omapulo naga pulwe pakunyolwa opo e ga tume koombelewa dhawo oonene natango.

– vkaapanda@nepc.com.na


2022-05-12  Victoria Kaapanda

Share on social media
Bottom of a page