ONGWEDIVA - Aaniilonga yomahangano agehe taga longele koongamba dhaNamibia naAngola, oya popi omawupyakadhi ga ningi ethimbo taga nkundipaleke iilonga yawo nuunene ethimbo ndika lyoCovid-19, sho ya li ya ningilwa omapekaapeko kokakomitiye komutumba gwokaansela okuza komutumba gwopashigwana moshitopolwa shaMusati.

Oongamba odha kalelwa po kiikando ya yooloka, etanga lyopolisi, oshikondo shokukondolola kehe sho tashi zi nenge tashi ya moshilongo, oshikondo shokukondolola omayinyengo gaantu okuya mo nokuza moshilongo, omafutilo goopate, Uuministeli wuunamapya, omeya nomakuti oshowo oshikando shUuministeli wuundjolowele nonkalo nawa. 

“Omunashipundi shokakomitiye komutumba gwokaansela, momutumba gwopashigwana  Lebbius Tobias  okwati,  onkalo  yaanambelewa yeli koongaamba otayi nyanyaleke noya pumbwa omakwatho goomehendelelo,”Tobias ta ti ngaaka.
Ta popi nongeyo kutya, omawupyakadhi gamwe  gataalela aanambelelwa mboka ka geshi omadhigu okukandulwapo, otaga vulu okukandulwa  miitopolwa yawo itaashi kwata nesiku limwe, no itashi pumbwa okukandathanwa koombelewa onene koWindhoek.
Kundana okwali adhidhilike odhalate ndjoka ya topola Angola naNamibia kaayili monkalo yili nawa. Odhalate oya gwa, naAngola ohaya iyakele moshilongo itaya pitile pomiyelo dhili koongamba.

Aanambelewa oyali ya gandja omanyenyeto gawo kutya, nonando oya pata oongamba nomakumba natango aantu otaya piti ashike mooha oshoka ka puna odhalate nande nande.
Ta pula kutya oshike aanambelewa yelile po ooya kwawo  itaya longo iilonga yawo ngaashi ye yi nuninwa. Oshike wa inekelelwa koshigwana she kuhogolola wu shiningele omawunawa noku eta omalundululo ihe ito gwanithapo omahalo gawo?
“Omuntu kehe ohalongo ilonga ye ayihe nomelandulathano ngele eli mehala lyasilwa oshimpwiyu, lya yela no lina iilongitho ayihe ya pumbiwa.  Omawupyakadhi ngoka oga pumbwa okukandulwapo mehendeelelo,”Tobias ta popi ngaaka.
Okakokomitiye hoka okali kakatalelepo oongamba moshitopolwa shaTjozondjupa, Kavango west no east , oshowo oongamba adhihe ndatu dhomoshitopolwa shaMusati Ruacana, Omahene oshowo Kashamane.

Ta ti, Oongamba adhihe ya talelepo, odhindji  odhina omawupyakadhi ga faathana. Aanambelewa ka yena omagumbo, omeya, omalushena oshowo uundjugo.  “Uunene aanambelewa yetanga lyegameno taya nana nondatu ngele tashiya komahala go kuza, iiyenditho oshowo omizalo dhilonga. Shika otashi gandja omawupyakadhi kaanambelewa ya longe ilonga yawo ya gwanapo oshoka ka yena ombili yokomutima,” Tangeni ta popi ngaaka.

Tangeni natango okwali akumagidha kehe omuniilonga gwepangelo, a kale amanguluka okulongitha kehe shimwe shili kohi yepangalo. 
Agandja oshiholelwa ta ti, ngele opena omagumbo ge pangelo ihe kagena aantu, naga longithwe ku kehe omunilonga gwe pangelo eli po. 
Omukuluntu gwoCustom koongamba dhaKasamane  Jeremia Shipungo, okwa ti, oyapumbwa omakwathelo ga gwedhapo nonando oya pewa omashona okwiikeelela komukithi gwoCovid-19 oshoka oyo nana yeli moshiponga unene.
“Anilonga ayehe taya longo poongamba oshilongo ashihe oyeli muupyakadhi. Ihe  otwa pumbwa oshimaliwa sha gwedhapo okwiikwathela uuna twa kwatwa komukithi  ngoka, na una taya pumbwa okwiikalekelwa oshoka oshimaliwa ta tukwata komwedhi itashi ka gwana,” Shipungo ta ti ngaaka.

Tanyenyeta kutya oongamba dhawo kadhina eshina lyo kuya stinina ombuto yoCovid-19. Eshina ndyola olya pumbiwa okukala tali tsinine oombelewa dhawo oshowo omagumbo gawo, kehe esiku nenge kehe konima yomasiku gaali.
Shipungo ta ti, kehesiku oyena okuya popepi  naahijgi yomaloli yuuka  nenge taya zi moAngola. Ta ti oya kwatwa nokuumbanda okuya komagumbo yaka talelepo aakwanezimo yawo  oshoka kayeshi mpo ya thikama.