Aanafalama yiimuna oyendji monooli ayihe oya tembukile moshitopolwa shaShana, taya kongo uulithilo wiimuna yawo, omolwondjala oshowo enota lya etwa komvula inayi loka.

Aanafalama ya za kiitopolwa Omusati oshowo Ohangwena oya dhiki ootenda dhawo moshikandjohogololo shUuvidhiya, ya kalela iimuna yawo.

Ngoleneya gwoshitopolwa shaMusati Erginus Endjala okwa ti, onkalo oya nayipala, nongele otayi tsikile yili ngaaka, otashi ka hulila muuwinayi.

“Aanafalama otaya ka kanitha iimuna yawo, omolwa ondjala. Otuli monkalo kaatuna nkene tuna okuninga, ihe otwa tegelela ashike shoka tashi holoka,” ta ti ngaaka.

Endjala okwa ti, shoka tashi yemateke oshoka kutya, pomahala mpoka pe na uuluthilo, pe na omwiindhi, hapo pena omeya. 

Iimuna oya pumbwa okukala tayi li oomwindhi oshowo omeya ga gwana opo yi paluke
komalutu.

“Otwa kanitha omukumo, nonkalo otayi ende ya uka kuuwinayi esiku kehe,” ta ti ngaaka.

Kansela goshikandjohogololo shUuvudhiya Timoteus Shivute okwa ti, omayinyengo gaantu oyendji unene koshikandjo she, oshinima itaashi pelwa omuntu ombendhi, oshoka kehe gumwe kegulu oku wete ko

“Omvula ndyoka inaayi loka oya etitha omangungo gaanafalama yiimuna okuza komalukwalo gawo okuhupitha iimuna yawo,” ta popi ngaaka.

Shivute okwa ti aanafala taya kongo uulithilo wiimuna yawo oya ponekele moshikandjohogololo shawo, hoka kwa talika oko kuna ehala enene li na omwiindhi nomeya.

“Uupyakandhi omboka
kutya, oshitopolwa shetu kashi na we omwiindhi ogundji, sho gwali gwa hanagulwa po kepeya ndyoka lya kala nokuholoka iikando oyindji omumvo gwayi,” ta fatulula ngaaka.

Shivute ta ti, oye li momalimbililo, ihe natango oye li metegelelo lyomvula. 

“Sigo onena inatu lopotelwa oshimuna sha si kondjala, niimuna oyishi natango okutalika komalutu” ta popi ngaaka.

Sam Shikongo ngoka ena ohambo yiimuna moshikandjohogololo shUuvundhiya, okwakumagidha aanafalama aakwao yatameke okulanditha iimuna omanga ku yele.

“Tamekeni okulanditha
iimuna omanga yi na ongushu, tayi vulu okuza oshimaliwa shili hwepo, shi vulithe okutala oshimuna tashi isile, inashi za oshimaliwa nando,” ta kugidha ngaaka.

Ta ti, aalandi yiimuna nayo naya lande sha ikwatelela koondando yongushu yiimuna, ihe inaya kengelela aanafalama, oshoka kayena nkene yena okuninga.

“Aanafalama nayo naya kale yakotokela aalandi yiimuna oshoka otaya vulu okulongitha ompito ndyoka okukengeela aafalama,” ta ti ngaaka

– vkaapanda@nepc.com.na