ONIIPA-Aakalimo yomondoolopa yaNiipa moshitopolwa shaShikoto nomikunda dhopuushinda oya kugu onkugo opo ya kwathelwe okuyambidhidhwa noshitaasi momudhingoloko gwawo oshoka otaya hepekwa kongundu yaanyasha tayi ithanwa Amaguruguru ndjoka ya tsikile oku ya yuga iinima yawo noku ya dhenga.
Ongundu yaamati naanakiintu yomimvo dhopokati yedhina Amaguruguru ndjoka ya tototelwe po omimvo ntano dha ka pita onkene tayi tsikile nokutyatyaleka. Ihe nuumvo oya pimbila noonkondo, noya thikamitha aakalimo yomoshitopolwa opo ya indile opolisi yi ninge onkambadhala yomeendelelo.
“Oniipa oyi li miita nonando oshilongo oshi na ombili, out li muupyakadhi uunene, otwa hala okuyambidhidhwa opo tu pewe oshitaasi moshitopolwa shetu, pamwe iimbuluma tayi ningwa nena tayi shonopala. Out li muupyakadhi wu vule oonkalamwenyo dhetu,” Kansela gwaNiipa Jerry Ngwena ta ti ngaaka.
Ta gwedha po ta ti nuumvo ongundu ndjoka yedhina Amaguruguru oya pimbila shi nyanyaleka. Ongundu ndjoka ohayi tegamene mboka taya ka talela po aanuuvu yawo koshipangelo oshinene shaNandjokwe noku ya dhenga e taye ya yugu iikulya mbyoka ya li tayi faalelwa aanuuvu. Ihe iikulya mbyoka inaye yi hala oshoka iiwinayi ohaye yi tilehi noku ya dhenga.
Ngwena ta hokolola ta ti ngele etango lya ka pa oyana, nena Oniipa nayo oya hwama, aapangi mboka taya zimbuka nenge taya ka tameka iilonga ohaya kala muupyakadhi wa kehe siku oshoka oye na okudhengwa nokuyugwa oongodhi nakehe shoka ya pumbwa ko kuyo.
“Mboka haya heluka uusiku okuza komaushimba oyo iihakanwa yayo. Komagumbo ohaya thiki ko ya mona iihuna kongundu ndjoka Amaguruguru oshoka iimaliwa noongodhi oshowo kehe shoka ya li taya faalele komagumbo oha ye yi kuthwa”. Kansela ta yelitha.
Ngwena okwa li a lombwele onzonkundaneki ndjika kutya onkalo yi li ngaaka itaye ke yi idhidhimikila nando we. Ta ti ongundu ndjoka oyi na ehwata lyuunona mboka wa ndopa ondondo 10 oshowo 12 omvula ya zi ko.
Ta ti onkalo ndjoka oya li ya faalele omwenyo gwomulumentu gumwe ngoka a li a kala nokuhepeka omusamane gumwe gomoshitopolwa osho ngaa tuu shoka ihe sho a kala nokushilopota kopolisi ihayi kutha onkatu ya sha.
Omusamane ngoka gomukuntu sho a li a loloka okupiyaganekwa nokuningilwa omiyonena komulumentumati ngoka, okwa li sha eta sigo a kuthwa omwenyo komusamane ihe halo lya li elalakano ashike okwa li a loloka. Kansela ta hokolola ngaaka.
Maria Nangombe a yambukile momukunda Oniipa okwa ti shoka tashi popiwa ote shi koleke, oshoka ongundu ndjoka oya li ye mu ponokele muDesemba omumvo gwa yi noku mu yuga N$2 000 nongodhi ye yopeke ndjoka ya li ya kotha N$2 500 nondjato ye yiikutu sho a li ta zi kuushimba a uka kegumbo potundi ontimulongo yokongulohi.
“Oshitopolwa shetu osha ninga oshiwinayi, okwa li ndi shi ongundu ndjoka Amaguruguru oya hula nani hasho. Otandi yambidhidha lela kutya moshitopolwa namu ye oshitaasi pamwe tayi hulitha po omiyonena oshoka otaya tila opolisi ngele yi li popepi.
Oomwenyo dhetu kadhi kala we pomahala, unene ngele tatu ende ohatu kala twa tila okuponokelwa nokuningilwa omiyonena,” Nangombe ta ti.
Opolisi mOshitopolwa shaShikoto oya li ya tumu ko aanambelewa ya kale taya patolola noya li ya tameke Omaandaha goshiwike shika, ndjoka tayi ka kala tayi patolola esiku kehe.