Uunona wuukadhona uyali owa si omeya sho kamwe ka li taka kambadhala okuhupitha okamwayina hoka ka yi momeya tango. 

Oshiningwanima shoka osha holoka momukunda Okakumangua momundhingonoko gwEpupa moshitopolwa shaKunene mehuliloshiwike lwopotundi 15h00.

Otaku hokololwa kutya okakadhona komimvo 13 oka li ka nukile momeya nelalakano lyokuyoga, ihe oka li ka nyengwa.

Opolisi tayi ti okamwayina komimvo 14 oka li ka landulile mo okamwayina momeya ihe ayehe okwa li ya nyengwa okuza mo etaya si omeya.

Omakonakono gopolisi otaga tsikile naakwanezimo oya tseyithilwa.

Moshiningwanima sha yooloka kushikwao, opolisi moshitopolwa shaShikoto oyi li molukongo lwomuntu ngoka a pumu aantu yaali, e ya monitha iiponga, nokufadhuka po.

Oshinigwanima shoka osha holoka uusiku wOsoondaha mondjila onene yokuza kOmuthiya okuya kOndangwa.

Sha ikolelela komugandji gomauyelele gwopolisi moshitopolwa shaShikoto Ellen Nehale, omulumentu gumwe ngoka e li kokatemba okwa li ta undulwa kumukwawo, sho kwa li ya pitulwa po kohauto ndjoka.

Nehale okwa ti, aalumentu mboka okwa li ya ehamekwa nokwa li ya falwa koshipangelo meendelelo.

Opolisi otayi indile moshigwana ngele oshi shi ngoka a longo iilonga mbyoka opo a lopote omuntu ngoka a mangwe po.

Tayi kumagidha kutya oshigwana nashi kale aluhe  hashi kankama uuna sha ningi oshiponga moondjila, okuyanda omaupyakadhi taga ka holoka konima wa mangwa.

Ya ti, aluhe thikama e to kongo omakwatho agehe ga pumbiwa.

Opolisi natango oya indile aanangalashe ya lopote uuna ya etelwa ohauto ya mona oshiponga kape na uuyelele kutya oya ninga koshike.

Caption: Omulumentu e li kokatemba oshowo ngoka a li te mu undula oye li moshipangelo sho ya pumwa kohauto omanga taya taaguluka opate.

vkaapanda@nepc.com.na