Aanona yaali oya si omeya, omanga okatitatu ka hupithwa mondama yonyata moka wali tau dhana. 
Oshiningwanima shika osha ningwa Etine lyoshiwike sha zi ko momukunda Onandjaba moshitopolwa shaMusati.
Omukuluntuluntu gwopolisi moshitopolwa shaMusati Titus Shikongo okwa ti, oshiningwanima osha holoka potundi 19h20 yokomatango momudhingoloko gwaKalongo.

Otaku hokololwa kutya uunona mboka awuhe utatu, okwali tawu dhana popepi nondama yonyata.
“Uunona okwali wagwile mondama, pethimbo wali wa hala okukwata oohi. Yaali oyali ya si ethimbo ndyoka omanga gumwe gwomimvo ne, a hupithwa, ihe okulimonkalo tayi limbilike,” Shikongo ta ti ngaaka.
Oonakusa oya tseyika nomadhina Ndinelago Kuhatumwa (4) oshowo Penehafo Shivandu (3), ayehe oya yambukile momukunda omo tuu moka.
Shikongo okwa ti, kapena uuyelele wa gwana kombinga yomaso ngoka. Aakwanezimo ayehe oya tseyithilwa. 
Omakonakono gwopolisi ogeli metifa .