New Era Newspaper

New Era Epaper
Icon Collap
...
Home / Aanona yAangola ya taalela onkalo ondhigu moNamibia

Aanona yAangola ya taalela onkalo ondhigu moNamibia

2022-10-03  Victoria Kaapanda

Aanona yAangola ya taalela onkalo ondhigu moNamibia

Uunona Uuangola womimvo ndhili pevi lela, okuza pomimvo ntano okuya pombanda, owa taalela onkalo ondhigu, sho tau ende tau li momandoloma oshowo tau ende tau indile iikulya momapandaanda, miitopolwa yomonooli, omanga yamwe taya lala momahala itaaga hokitha.

Oshifokundaneki shika oshiwike sha ziko, okwa li sha tsakaneke aanona yaAngola yomimvo tadhi tengenekwa okuza puntano sigo heyali, taya tondokele oohauto tandhi kankama kooha nopate mOshakati, opo wu landithe shoka wa humbata, ngele itau indile oshimaliwa shoku landa sha sho kulya.

Oshiwike shoka natango okanona kamwe kOkaangola okali ka lyatwa kohauto mOshakati, lwopOkatana Service, sho kwali taka taaguluka opate. Elago enene oka hupu no kali ka kamona uuhaku meendelelo.

Ayihe mbyoka otayi holoka omolwa onkalo yataalela aanona mboka, ya taaguluka okuza koshilongo shawo omolwa onkalo ndyoka ya nyayika, yondjala tayi ya tidha ko.

Nonando taya tondokele moNamibia omolwa uuhupilo, ya pewe iilonga yoko make, shoka natango uupyakandhi uuna aanona mboka ya pewa iilonga moNamibia oshoka oye li kohi yomimvo, oyena okukala yeli moosikola.

Shoka osha tali kako onga omahepeko, nonando oya hala okulonga ya mone oshimaliwa.

Uuministeli wokakwashikekookantu, owa ti, owuna ontseyo kombinga yonkalo yaanona mboka ye li mehalakano moondoolopa, Oshakati, Ondangwa nOngwediva.

“Uuministeli owu li metifa okukonakona nkene wuna okulonga nomandiki galwe miitopolwa moka, opo uupyakandhi mboka wataalela aanona mboka wu kandulwe po,” omupevi kuluntu muuministeli wokakwashike kookantu Martha Mbombo, ta fatulula ngaaka.

Ta ti, poonkatu ndhimwe ngaashi ndhoku tulwa moosikola, pa ekotampango lyaNamibia, aanona mboka oyena okukala yena oonzapo ndho mavalo, ndhoka kaayena, naamboka uupyakandhi wa gwedhwa ko.

“Omapangelo gaali gaAngola naNamibia oga kala nokulongela kumwe omanga oshilongo inaashi manguluka, no taga tsikile okulongela kumwe okusila oshimpwiyu aantu yawo,’’ ta ti ngaaka.

Kristophina Nakandungile omunambelewa yambindhindhi gwaNgoloneya gwoshitopolwa shaShana Elia Irimari okwa ti, ombelewa yoshitopolwa shaShana oya kambandhala okukwathela mpoka tayi vulu, ihe inashi kwathela sha.

“Kapena opologalama yili po nkene aAngola yena okuyambindhindhwa, sho shoka aantu mboka kayena nkene yena okuyambindhindhwa pethimbo ndika,” ta fatulula ngaaka.

Ta gwedhapo kutya nonando oya shunwe koshilongo shawo, konima yominute ndho ntumba, natango owuli mumwe nayo.

Ta ti,  oshoka shoka sheya kutha koshilongo shawo inashi kandulwa po, onkene otashi ya hingiko natango.

Omukuluntu gwopolisi moshitopolwa shaShana Naftal Lungameni Sakaria okwa ti, onkalo yaanona ye li kohi mimvo, taya landitha momapandaanda otayi themenene.

‘’Uuministeli tau ungaunga noontauki owa pumbwa okuindhopa mo noku kandula po uupyandhi wataalela aanona mboka,” ta ti ngaaka.

Ta ti, Aangola oya pumbwa okushunwa koshilongo shawo.

Magdalena Simeon ngoka eli omukwashigwana waAngola ngoka a kala moNamibia omimvo dha pita 20, okwa ti, ohashi lindimaneke omitima ndhawo uuna a tala Aangola aakwawo taya ende taya indile iikulya omanga yamwe taya li momandoloma giiyagaya.

“Shika otashi ulike kutya epangelo lyetu lyaAngola kalina no shigwana shalyo. Kehe shimwe oshiwinayi otashi vulu okuholoka kaanona mboka omanga taya taakana nomapaandanda nokulala pomahala inaaga gamenwa,” ta ti ngaaka.

Ta gwedha po ta ti, uupyakandhi mboka owa ningi uule nethimbo, ihe sigo onena inau kandulwa po.

Oombelewa ndhaAangola moNamibia sho kwa li dha pulwa opo ndhi tyeko sha, okwa li dha yamukula kutya ngoka ena okuyamukula omapulo agehe kombinga yaanona mboka, kuuvite nawa, okuli mefundho.

Yina yokanona kamwe ngoka ali komeho gaanona mboka yatatu okwati, kena nando ohokwe nedhiladhilo lyokushuna koshilongo shawo, oshoka anuwa okuna ondjala.

“Koshilongo shetu ka kuna aantu yena ohenda nando, oto si ondjala kaa pena ngu teku yambidhidha, nepangelo lyetu kali na nase,” ta po pi ngaaka.

Ta ti, moNamibia omuna aasinamutimahenda mboka haya gandja okashona yena, nonando kashi shi oshindji, oshi vulithe owala.

“Shoka shetu eta koNamibia ondjala, ka shi shi kutya otwa hala okufadhuka po oshilongo shetu, ihe ngele uupyakakdhi mboka itawu patukununwa, nena na se itatu shuna,” ta popi ye ta tanguna ngaaka.

Ta ti, ohatu landithitha aanona mboka oshoka oyo haya silwa ohenda shi vulithe se aakuluntu.

“Shika oshi vulithe okukala nda tala aanona yandje taya si ondjala, omanga pena mboka taya vulu okuyapa okashina yena, ngele taya indile,” ta ti ngaaka.

Ta gwedha po ta ti, uunona wa wo ihau nyenge iinima yaantu inau yi pewa, ihe ohau indile.

Petameko lyomumvo nguka aAngola okwa Ii ya tumwa moNamibia, ihe ka kwa li sha kwatha sha, Oyendji okwa li ya ndalayako omolwa ondjala.

Uupyakandhi omboka kutya kapena ekondololo lya pama pokati koongamba ndiilongo mbika iyali onkene ohaya piti ashike ethimbo kehe.

Aangola omayovi okwa li ya taagulukile moNamibia omumvo gwayi, netompelo lyokukonga iilonga opo ya ihupithe omolwa onkalo ya nyayika koshilongo shawo. - vkaapanda@nepc.com.na


2022-10-03  Victoria Kaapanda

Share on social media