ONGWEDIVA - Omukuluntu gwoshikondo shuundjolowele moshitopolwa shaHangwena John Hango, okwa ti sigo onena omwaalu gwaantu ya ikalekelwa mehala lyokwiikalekelwa kumwe oye li 191, omanga 147 ya lalekwa ihe paife omu na ashike 44.
Okwa ti omwaalu ohagu ende tagu lunduluka, ano gwa yi pombanda gwa yi pevi, oshoka aantu yamwe otaye ya mo yamwe otaya zi mo ngele omasiku gawo ga pu ko, ngoka 14.
Okwa popi ta ti, ngaashi naana pamulandu gwa gandjwa kepangelo, Aanamibia ashike oshowo mboka ye na uuthemba ya pitikwa okugalukila moNamibia.

“Ohatu gandja omahala kaahingi yomaloli ya ikalekelwe, uuna ya galuka moAngola, ihe omasiku ga pita po14 sha ikolelela konkalo oshowo koompango dha tulwapo,” Hango ta ti ngaaka. 
Aantu ye li 147 oya mana ko omasiku gawo 14, ngoka haga kaliwa mehala lyokwiikalekelwa omanga ye li 44 ya ikalekelwa natango.  Okwa gwedha ko ta ti sigo onena inaya tsakanena uudhigu wehala okutula aantu taya fekelwa omukithi gwoCovid-19.
Ta ti, oshitopolwa shaHangwena sigo onena inashi tutsa nenge sha mona omuntu e na omukithi ngoka. 
Ta ti shoka sha simana ooshoka kutya aantu ya ikalekelwa mehala ndyoka omasiku agehe 14, ohaya kala kohi yesiloshimpwiyu enene nohaya tutswa kehe esiku,” Hango a popi ngaaka.

Okwa pandula epangelo, sho lyi na oshimpwiyu noku ya kwathela niilongitho osho ikeelelitho momahala gawo agehe moshitopolwa shawo.
Aantu oya ikalekelwa komahala ngaashi komagumbo ga-NIDA oshowo kohotela tayi ithanwa Shikulo mOshikango.
Pethimbo ndika mOhangwena omu na omahala gokwiikalekelwa g eli gatatu, ge li kEngela, Eenhana oshowo kOkongo.