New Era Newspaper

New Era Epaper
Icon Collap
...
Home / Aantu ye li 575 oya sa koCovid-19

Aantu ye li 575 oya sa koCovid-19

2021-04-15  Victoria Kaapanda

Aantu ye li 575 oya sa koCovid-19

Minista guundjolowele nonkalonawa Kalumbi Shangula okwa ti sigo ompaka aantu ye li 575 oya sa komukithi gwoCovid-19 okuza esiku gwa ponokele moNamibia muMaalitsa omumvo gwa zi ko 

“Otandi tsikile okukumagidha oshigwana shi itule mo mokutaamba omiti dhokukeelela omukithi ngoka. Shoka osho ashike tashi vulu okukaleka po oomwenyo dhetu,” Shangula ta ti ngaaka. Ta ti, omiti ndhoka otadhi gandjwa oshali shaMuhongi, onkene kehe gumwe oku na uuthemba okupewa omiti ndhoka.

Aalongwa ye li 120 oya kwatwa komukithi gwoCovid-19. Aanona ye li 14 yomuyo oyokosekundosikola Nkurenkure omanga oyendji yokosekundosikola Rehoboth.

Shangula okwa ti, aalongi ye li yahamano oshowo aaniilonga mendiki lyuuministeli wuundjolowele ye li yatano, nayo oya kwatwa koCovid-19.

Nonando omwaalu gwaantu taya aluka ogu li poopelesenta 95, aantu ya kolekwa ye na omukithi gwocorona oshilongo ashihe oye li 1 480, “ Shangula ta ti ngaaka.

Ta popi ta ti, aantu ye vule po101 oye li miipangelo naantu ye li 32 yomuyo oye li kiifudhitho.

Omwaalu ngoka ohagu ende tagu lunduluka esiku kehe oshoka kehe mesiku otamu kwatwa nenge tamu aluka aantu oshowo taya hulitha,” ta ti ngaaka.

“Aantu ye li yatano oya si koondoolopa Grootfontein,Karasburg noMariental omanga yaali ya si moWindhoek, mboka ya tula omwaalu gwaantu ya huliha kocorona gut hike po575,” ta ti ngaaka.

Minista natango okwa popi ta ti, okuza esiku lyotango omukithi ngoka gwa ponokele moNamibia, aantu ya konaakonwa, taya fekelwa omukithi gwoCovid-19 oye li 45 787 ayehe kumwe.

Ta ti, aantu ye li 42 664 oya li ya ikalekelwa omanga ye li 41 231 ya li ya aluka. 

Shangula okwa ti, ngashiingeyi aantu ye na omukithi gwocorona oye li 1 480 moNamibia.

“Otandi kumagidha oshigwana shi tsikile okugwanitha po nokulongitha iikeelelitho, okushonopeka oshowo okukeelela omukithi gwoCovid-19,” ta kumagidha.

Shangula okwa ti, omukithi omo gu li mokati koshigwana, onkene oshigwana nashi simaneke okuzala uumasika momahala gwomangundumano oshowo okwiiyoga koonyala ethimbo alihe.


2021-04-15  Victoria Kaapanda

Share on social media