Aakalimo yomoshitopolwa shErongo ye vule 450, okuza omvo gwayi oya kanitha oombashu dhawo okupitila momililo, ethimbo lya yooloka.

Oombashu dhili 25 oshowo omamgumbo geli gatatu oga pipo thiluthilu Olyomakaya ya ziko, naantu yeli 140 oya thigwa kaayena omalukalwa.

Kapena natango uuyelele wothaatha kutya oshike sha eta omulilo ngoka, nonando yamwe aya hokolola kutya opena gumwe ali athigi ombiga kesiga eta kotha, omanga eli kohi yiikolitha.

Ethimbo New Era ali athiki poshiningwanima mpoka, gumwe ngoka akanitha ombashu ye momililo, okwali ta kugu ye tanyenyeta kutya, iinima ye okweyilonga ethimbo nuule, ngaashi eyi kanitha ashike momutenya gumwe.

“Paife otandi kala handi zi peni, noluvalo lwandje. Iinima yandje oyindji ya pile mo,”ta lili ye takugu.

Sergeant Anastacia Frans ngoka hakondolola omaupyakandhi golundhi ndoka, okwali afatulula kutya omulilo gotango okwali gwa tameke megumbo limwe, mostrata tayi ithanwa, Guinea Fowl, moka oombashu omugoyi dhali dhapi tango.

“Omulilo ngoka okwali gwa kwata omagumbo gatatu galandulako, hoka natango gwakatsikila komagumbo 16 nokuhanagulwapo,” ta hokolola ngaaka.

Kadhimamulilo okwali athiki konima omulilo gwa yaka nale, ihe inaku lopotwa mwa monikila omuntu oshiponga.

Ayehe mboka ya ningi iihakanwa, oya pewa ootenda dhopokathimbo, omanga elelo lyondoolo tali tala sho tali ningi po.

Shoka oshikando oshitatu oombashu tadhipi mOmbaye momukala guli ngaaka.

Omulilo gotango okwali gwa holoka momasiku 26 July 2020, sho aantu ye vule 200 kwali ya thigwa kaayena omalukalwa, molukanda Twaloloka.

Omvo nguka muJanuali aantu yeli 121 natango okwali ya kanitha omagumbo gawo, molwa omulilo.

Aantu yamwe yo mwaamboka, okwali yatungilwa omagumbo, omanga yamwe yeli metifa okutingilwa gao.  

Caption: Aantu ye vule 450 ya kanitha omalukalwa gao moshitopolwa Erongo.

vkaapanda@nepc.com.na