New Era Newspaper

New Era Epaper
Icon Collap
...
Home / Aanuumvu yoCovid taya ehamenene ya indjipala

Aanuumvu yoCovid taya ehamenene ya indjipala

2022-01-12  Victoria Kaapanda

Aanuumvu yoCovid taya ehamenene ya indjipala
Top of a Page

Omukithi gwoCovid-19 ngoka kwa li gwa loto okuya pehulilo lyomumvo gwa yi, ogwa tukuka ishiwe, tagu indjipala go tagu faalele oomwenyo dhaantu.

Uuministeli wuuhaku nonkalonawa owa lopota kutya aantu ye li 402 oye li miipangelo, moka ye li 34 yomuyo ye li kiifudhitho.

Aantu ye li yahetatu yomwaamboka ye li moombete oya tuntilwa lumwe, ye li 38 oya tuntilwa iikando ayihe omanga ye li 356, inaya tuntilwa nando nando.

 Uuministeli owa gwedha po kutya gumwe gwomwaamboka ye li kiifudhitho okwa tuntilwa iikando ayihe, gumwe okwa tuntilwa lumwe omanga ayehe ye li 32 inaaya tuntilwa nando. 

Minista gwuuhaku nonkalonawa okwa ti, aantu ye li 3 726 oya faalelwa koCovid-19 okuza esiku ya ponokele moshilongo omumvo gwa yi.

“Omukithi nguka omukwakukandekwa, otagu loto ashike uuna tagu ngambekwa nongele aantu ayehe ya tuntilwa,” ta ti ngaaka.

Minista okwa kumagidha oshigwana kaashi tegelele sigo omunute gwahugunina, okugamena aapambele oshowo ookuume.

“Okuza momwaalu ngoka gwa pitithwa, otashi ulike kutya aantu oyendji ye li miipangelo, ya kwatela mo noye li kiifudhitho, oomboka inaaya tuntilwa, omanga mboka ya tuntilwa aashonashona yomuyo,” ta fatulula ngaaka.

Ta ti, nonando omiti dhokutuntila itadhi keelele thiluthilu, otadhi kwathele lela.

“Sho osho shoka tatu fatulula kutya omiti ndhika itadhi keelele omukithi nguka thiluthilu, ihe otagu kwathele ashike okushonopaleka ompito yoku ehama noonkondo,” ta popi ngaaka.

Minista ta ti, omukithi ngoka omo gu li natango, onkene oshigwana inashi sholola okugwanitha po oompango ngaashi naanaa sha ningila sho kwa li gwa shonopala  omumvo gwa yi.

 Ta ti, okuntilwa oko ashike taku dhana onkandangala onene oshowo okukeelela omaso.

“Otandi tsikile okukumagitha nokutseyitha uuwanawa wokutuntilwa. Kehe ngoka a tuntilwa, a mana ko omalweetho agehe gaali, ota henuka eso oshowo okukwatwa komukithi gwoCovid-19,” ta kumagidha ngaaka.

Ta gwedha po ta ti, omiti ndhoka omo dhi li moshilongo odha gwana, onkene aantu naya thikame nena.

 “Shoka sha simana okugwanitha po omalandulathano noompango tadhi zi koshikondo shuuhaku, ngele kehe gumwe okwa tuntilwa, ompito yokukwatwa komukithi gwoCovid-19 otayi shonopala,” ta ti ngaaka.  – vkaapanda@nepc.com.na


2022-01-12  Victoria Kaapanda

Share on social media
Bottom of a page