New Era Newspaper

New Era Epaper
Icon Collap
...
Home / Aanyasha ya limbililwa ko-ECN

Aanyasha ya limbililwa ko-ECN

2024-05-20  Correspondent

Aanyasha ya limbililwa ko-ECN

Charles Ndeumane

 

Aanyasha oya holola okwaauva nawa kwawo sha landula sho ombelewa yomahogololo yaNamibia, Electoral Commission of Namibia (ECN) ya tseyitha kepandja lyayo lyoFacebook kutya oya tameka okudhengela mboka ya hogololwa ongaanambelewa yomaishangitho momahogololo tu uka. Oyendji yomwaamboka kwa li yu udhithile oopoosa ndhika oya holola omaiyuvo ga yooloka sho taya shanga kohi yetumwalaka lyo-ECN koFacebook.

Shika osha landula sho ombelewa yomahogololo ya pititha oombapila dhomadhina gaamboka ya hogololwa onga aataleli yomaishangitho gomahogololo koFacebook oshowo kepandja lyayo lyokomalungula lyopambelelwa, nokonima yesiku limwe oya tseyitha kepandja lyayo koFacebook kutya mboka ya hogololwa onga aanambelewa yomaishangitho ota ya dhengelwa oongodhi. Etseyitho ndika olya limbililwa koyendji.

Aalongithi yoFacebook oyendji oyuulike kutya otaya konenene uulingilingi momukalo nguka tagu longithwa kombelwa yomahogololo. 

Oyendji otaya pula kutya omolwashike ombelelwa yomahogololo itaayi pititha oomombapila dhomadhina gaambo ya hogololowa ngaashi ye shi ningile mboka yahogololwa onga aataleli yomaishangitho? Yamwe otaya tamaneke kutya ombelewa yomahogololo oya hala okuninga okatongo moku gandja oompito dhiilonga kwayo. 

Yamwe oya nyenyeta komukalo gwokudhengela aantu oshoka otashi vulika oyendji ya ka kanithe ompito ndjika molwa onkalo yomakwatathano yaali nawa komikunda, nenge oongodhi dhawo dhi kale dha dhima pethimbo ombelewa yomahogololo ta yi ke ya dhengela. Pethimbo lyomapulapulo noshifokundaneki shika, omukuluntu gwiipambele yomakwatathano mombelewa yomahogololo, Mulauli De-Wet, okwa ti osha pumbiwa opo ombelelwa yomahogolo yidhengele mboka ya hogololwa opo yi mone mboka yiilongekidhila Iilonga mbyoka, nokonima opo nawa ta yi ka pititha oombapila dhomadhina. 

Kwaamboka ya tila oku pitililwa po kompito ndjika molwa oongodhi dhawo dha dhima nenge omakwatatha kaage li nawa, De-Wet okwa ti ota ya vulu oku dhengela ombelewa yomahogololo opo ya pule ngele omadhina gawo oga pitamo, ashike naya kale yena etegelelo oshoka ombelewa otayi dhengelwa kaantu oyedhi onkene otashi vulika shi kwate ethimbo oku yamukula oongodhi dhawo. “Uuna twa mana oku hogolola mo mboka taya ka longa onga aanambelwa yomaishangitho, oombipila dhomadhina ota tu ke dhi tula komapandja getu agehe gopaungonba opo ayehe mboka yuudhithila oompito ndhika ye ga mone, naamboka ya pita mo yam one esiku naampoka taye kiilopota”, De-Wet a tsikile ko. -mrndeumaneraycharles@gmail.com


2024-05-20  Correspondent

Share on social media