ONGWEDIVA - Aalandithi yomomapandaanda mOkahao otaya nyenyeta, sho taya tidhwa pomahala ngoka ya kala nale taya landithile, nonando otaya landula nokusimaneka omalombwelo ga tulwa po okukeelela omukithi gwoCovid-19.
Aalandithi oya li ya ponekele ombelewa yoshifokundaneki shika, taya nyenyeta kutya otaya monithwa iihuna kelelo lyondoolopa lyaKahao, oshoka otaye ya tidha pomahala gawo gokulanditha noku ya pa uutikete.
Omulandithi gwokapana gumwe gwomwaamboka, okwa ti otaya mono iihuna, noya loloka okuhepekwa ya fa kaaye li moshilongo shawo, ta ti ano oshike ye na okufukwa yo ye na uumasika, noothewa dhokwiiyoga koonyala yo natango oya pitith apo omahala pokati kawo.
“Ngashiingeyi otwa pewa uutiketa, aniwa sho twa adhika tatu landitha momapandaanda, na kehe gumwe na kale a futa N$2 000 omanga omasiku 31 gaMai nummvo inaaga thika. Epulo lyandje otali ti, iimaliwa mbyoka otayi zi peni ngele inaya hala tu landithe?”Omulandithi gumwe ta pula ngaaka. Gumwe natango okwa li a popi ta ti, elelo lyondoolopa otali thiminike aantu ya ka landithi komatala hoka ku na aantu oyendji, nokwa thinana. “Ashiti elelo kali na sha nomangundumano ngoka taga keelelwa moshilongo? Oshinima ya pumbwa okukoneka momatala omu na ashike mboka ya uthwa ya ye mo, ihe haatuhe twa pitikilwa mo, ano atu ka lya peni, ondjala ano oye yi uvite ngaa?” Gumwe ta popi neyeme.
Aalandithi oya ti oya hala okupewa epitikilo lyokulanditha momapandaanda. Oya hala okushuna pomahala gawo, oshoka otaya si ondjala. Taya nyenyeta kutya oshike ano epangelo ihali yalulula aakwanaluhepo, momagumbo oye li mo taya li shike ngele kape na iiyemo.
Natango oya popi kutya momatala kamu na ookasitoma onkene oya hala omahala ngoka haga udha aantu ngaashi pomuye ngoka gu li popepi noshipangelo oshowo pehala natango lyi li popepi noNamwater.
Aashingithi yomomapandaanda oya ti, yo kaye na nando uupyakadhi okusimeka oshowo okulandula omilandu dha tulwa po okukeelela omukithi gwoCovid-19.
Omunani gwondoolopa Timoteus Namwandi kakwa li ta monika ethimbo ndyoka opo a koleke oshinima shika nenge a tye ko sha.