Aashingithi yiikulya yOshiwambo ya pya naambyoka inaayi pya momauliko giipindi mOngwediva, oya ulike enyanyu lyawo ongula yOsoondaha sho anuwa ya galulilwa ompito yokupindika.

Selma Shikutu ngoka ta landitha iikulya yOshiwambo okwa ti, onkundana ndjoka sho ya li ya thiki momakutsi ge kutya omauliko gokomumvo gOngwediva otaga galulwa, konima kwa li ga kalekwa omimvo mbali dha piti, okwa li a kwatwa kenyanyu enene.

“Omukithi ngoka gwocorona okwa li gwetu shunitha monima poompito ondhindji, oshoka omahala ngaashi ndika ogo hatu mono ookasitoma, ihe oga li ga ningi ethimbo ga kalekwa.  Otandi popile ko natango yakwetu tu li nayo mehala muka oshoka otwa kala noku shikundathana kutya otuuvite nawa,’’ ta fatulula ngaaka. Ta ti, okuza esiku omauliko giipindi ngaka kwa li ga tameke okwa kala aalandi taya landa nawa, onkene otaya pandula.

“Ookasitoma otandhi ende nawa, oongeshefa otayi ende nawa, otatu pandula elelo lyondoolopa lyOngwediva sho lyetu galulile ompito ndika natango, okushingitha iilandithomwa yetu’’ ta pandula ngaaka.  

Paulina Andreas ngoka naye ta landitha iikulya yoshiwambo okwa ti, omauliko giipindi oshowo iilondithomwa ye otayi ende nawa nokuna omukumo goku landitha opo a mone mo oshimaliwa natango, opo a ka thitike oombululu ndhoka dha li dha holoka.

Okwa gwedha po ta ti, inashi kala nando oshipu okulanditha momandaanda, oshoka ovenisa inayi kala oyamba.

 “Muka oshimaliwa otashi yapo oshindji, pethimbo limwe. Otwa mono wo natango ookasitoma dha za kiitopolwa yilwe tadhi pula iinima yoshiwambo, oshoka anuwa oya pumba komahala gawo,” ta popi ngaaka.

Ta gwedha po kutya, otaya galikana omukithi ngoka opo gu hulepo thiluthilu, opo iinyangandhalwa mbika yi kale tayi holoka moondolopa adhihe moshilongo.

“Ota tu indile oshikando sha landula ko, opo omauliko giipindi ngaka ga gwendhelwe omasiku, nando iiwike iyali ayihe yuundha,” ta indile ngaaka.

Maria Nakale ngoka naye ta landitha iikwamboga okwa ti, nonande ookasitoma inadhi ya mehwata esiku ndyoka, otandhi  sapota nawa shi vulithe momapandaanda, ta ti okuna omukumo natango.

Aalandithi momauliko giipindi otaya landula omilandu dha tulwa po, oshoka omukithi ngoka gwa li gwa kalekitha inyangadhwala yolundhi nduka, inagu hula thiluthilu. 

Omiyelo ndhoka tandhi pitilwa kaantu, oondhina aakeleli yomaliko taya tula po elandulathano.

Aalandithi oya li wo ya lombwele Kundana kutya otaya ka ihumbata nawa, yo otaya ka landula nokusimaneka omilandu adhihe dha tulwa po ya kwatela mo okwiindika eengundumano poongeshefa dhawo. - vkaapanda@nepc.com.na