Uuministeli womidhingoloko nomatalelelpo owa holola ongeyo, molwonkalo yaatalelipo komahala gomainyanyundho, sho ya ndopa okulandula oompango nomalandulathano ga tulwa po.

Aantu oyendji oya li yatalele po omafuta moshitopolwa shErongo, ihe kakwa li ya ihumbata nawa kombinga yuuyogoki womahala.

Omupoliko muuministeli moka Romeo Muyunda okwa ti, oopalastika dhiiyagaya dhi li 480, okwa li dha gongelwa kaanilonga yuuministeli womindhingoloko.

“Iiyagaya mbyoka oyindji noonkondo, shoka kwa li sha pumbwa okukala oshinakugwanithwa sha kehe ngoka a talele po omahala ngoka,” ta nyenyeta ngaaka.

Ta ti, iiyagaya okwa li ya ekelwahi kehe mpoka momundhingoloko gwErongo, unene kehela tali ithanwa Dorob National Park.

“Shoka kasha li mondjila, ehala ngele olya kaka kape na ngoka ta hala oku li longitha, onkene olyi na okukala lya opalekwa uuna lya manwa okulongithwa,” ta ti ngaaka.

Muyunda ta ti, natango okwa li a ndhindhilike omaihumbato inaaga pitikwa komahala hoka ngaashi okudhana oongalo muule, nokuza mo moohauto dhawo momahala ga gamenwa.

Ta gwedha po ta ti, omahala ngoka oga pumbwa okusimanekwa omolwiinawenyo yi li mo.

Ta ti, nayo itayi kala ya nyanyukwa yi li mehala lya kakekwa kaantu omanga taya vulu oku opaleka.

“Oshikando tashi landula, aatalelipo yomahala ngaashi ngoka naya iyuthe koompango dha tulwa po,” ta kumagidha.

Muyunda okwa ti, uuyogoki ohau eta ombili pehala. Ehala ngele olya yela otali kala natango lyi na ombili lyo ewanawa.