ONANKE- Kansela gwoshikandjohogololo shUukwiyu Uushona moshitopolwa shaShana, Andreas Amundjindi, ota indile opo aakwashigwana mboka ye na omatungo ge li pandondo yi li nawa taga vulu okulongelwa kaanambelewa yopolisi  ihe otaye ga gandja oshali ya popye naye opo opolisi yi engene popepi.
Amundjindi okwa hokolola kutya aakwashigwana moshikandjohogololo she ohaya ende iinano iile oku ka konga omakwatho kopolisi, unene ngele tashi ya kokupatulula iipotha, okukwashilipaleka ookopi dhoondokumende dhawo noshowo oku ka lopota iimbuluma.

Okwa hokolola kutya iimbuluma unene yolugodhi ohayi holoka moshitopolwa shawo mokati kuusiku konima yowili yokupata oondingosho dha pitilila. 

“Aakalimo yetu ohaya ende oshinano shuule wookilometa 25 okuya kopolisi onkene ngele out na etungo lyi li pondondo yi li hwepo, pamwe opolisi otayi tu kwathele ngaa nande aapolisi yaali yatatu,” osho a hokolola ngaaka.

Amundjindi okwa li a hokolola euvonayi lye sho aakalimo yomoshikandjohogololo she taya lwithathana.
Okwa hokolola kutya okwa limbililwa konkalo yelongitho nayi lyiikolitha moshikandjohogololo she unene maagundjuka shoka hashi hulile unene momalugodhi.

Okwa hokolola kutya omu na aantu oyendji ya imonitha iiponga moshikandjohololo shoka ashike iiponga mbyoka oya holoka unene polukanda lwedhina Ombili , momukunda gwedhina Epandulo.
Okwa ti kutya kehe ethimbo oha pendulwa uusiku ta lombwelwa kutya oku na aantu ya monithathana iiponga sho ya li taya kondjo ashike opolisi oyi li kokule noonkondo.