New Era Newspaper

MTC Shares
Icon Collap
...
Home / AGRIBANK ta yandje omikuli koomeme, ovanyasha

AGRIBANK ta yandje omikuli koomeme, ovanyasha

2021-09-15  Festus Hamalwa

AGRIBANK ta yandje omikuli koomeme, ovanyasha
Top of a Page

Ombaanga younamapya yoAGRIBANK oyo hayi ungaunga noipambele younamapya okwali ya yambadida ovakainhu novanyasha nomikuli dokuya mounamapya momudo womayalulo 2020/2021.

AGRIBANK okwa yandya N$43 miliyona kovakainhu, N$387 miliyona kovanyasha veli koshi yeedula omilongo 40 ovo vena ohokwe yokukufa ombinga nounamapya.

Fillemon Nangonya mEtine okwa popya ta ti eshi osha tulwa moilonga oku dja momudodo wa djako muOkotoba, omo ovakainhu novanyasha kwa li va mona omikuli dokuninga oinyangadalwa yavo younamapya.

Okwa ti omikuli ota di ka futwa pamikalo dayooloka.

Ta ti omukuli umwe otau dulu okufutwa mefimbo lixupi okudja podula imwe fiyo eedula nhano, manga mukwao otau dulu okufutwa mefimbo lopokati okudja eedula nhano fiyo omulongo, omanga omukuli umwe tau dulu okufutwa mefimbo lile leedula 10-25.

Okwa yelifa ta ti omikuli edi oda yooloka komikuli dikwao shaashi ohadi yandjwa dina omilandu dapumbwa oku wanifwa po komunhu tete, onghee okwa ti eshi osha kwatelamo okuyandja oilongifomwa younamapya ile edu lomukuli onga eameneno lomukuli.

Onghee hano okwa ti kapena engambeko leedula kovakainhu ava vena ehalo lokuninga omaindilo okupewa omukuli, ashike ovalumenhu ava va pitikwa okuninga omandilo omukuli ova pumbwa va kale vena omido 18-35. “Ohatu lombwele ovakainhu novanyasha kutya ombaanga younamapya otai ka tameka okuninga oshikonga shokuyandja ouyelele tau ka kala uli kombinga yomukuli nghee una okukala wa yandjwa nokulongifwa,” Nangonya ta ti.

Okwa weda po ta ti ombaanga younamapya yoAGRIBANK otai dana onghandangala ya kula opo ikale ya yambula po eliko loshilongo.

– fhamalwa@nepc.com.na


2021-09-15  Festus Hamalwa

Share on social media
Bottom of a page