New Era Newspaper

New Era Epaper
Icon Collap
...
Home / ǂÂiǂhansens Covids ǁōgu di ǂharos Omahekeb !nâs ǂnamipe

ǂÂiǂhansens Covids ǁōgu di ǂharos Omahekeb !nâs ǂnamipe

2021-06-29  Kuzeeko Tjitemisa

ǂÂiǂhansens Covids ǁōgu di ǂharos Omahekeb !nâs ǂnamipe

Omahekeb ǁanǂgāsaben ge coronaxoxos khoraǂuisensa ǁkhaubas !aroma hâ ǁgaraga ǀnais ra dīs !gâ-ai noxopa ǀgaisase nî -ǁnâuǀnam, tib ge ǀkharisi ǂurusib direkteri, Jeremia Shikuloba ǁari go mî. 

Shikulob ge New Erab ǀkhab go ūhâ i dî!nâǁgamǁare-i, ai!â noxopa nē ǁōs di khoraǂuisens, !khō!namis tsî ǁîsa ǁgôaxa-ūs nē ǀkharib !nâs !aroman, ge ǁanǂgāsabena ǁguisa ǂurusib ǁgaragau Covid-19 ǂnamipe hâgu, aiǁgause maskerde ǂnûis, !omga ǁā tamas ka i o ǁkhaubaxū-i ǀkha !anus, ǂgaoǀkhāsa !nūsiba nē-e nau-e xū hâs, tsî ǂguisen khoena ǀhaohâ !khain tsî ǀhaode xu ū-oasens hâna. 

“Supu tama i ge hâ tare-i ra !aroma ti mîsa, xawe ǀnai ǀaen aiǁgause ǀgapiǀaos tsî suguriǁōs hîa ǁguisa ǁgaragu Covid-19 ǂnamipe hâgan khoena sao tama ra i, o nē mâsiba !gâi tamase ǀaro!nâs ǀguisa dī tsî ǁōga ǀams ai ra !aroma. 

ǂGui !gôagu !nâ ǀhaodi tsî !nubusib ǂkhari-omn tsî ǁgam-i din tsîn ge ǁîn tsîn a !aroma ǁkhā !gomsina,” tib ge gere ǀgomǀgom!gao. 

Aetsē ge !hūb a ǂhabase !nurihe 55 ǁōgu tsî 1007 ǀasa !nae!khaide xub ge Omahekeba, !gōsase ǁîb dana!ās ǂKhoandawesa 22 ǁōgu tsî 95 ǀasa !nae!khaide ge !nuri. 

Nēb ge kaise a ǀgapi !gôaba, ǀkharib ǁanǂgāsaben !gôaba !oa da nî kōs karao. 

Nē 22 ǁōga xun ge disi!nonaǀa khoena ǁgâudi tawa ge ǁōǂoa tsî khoesen ǀguina ǀaeǁgâub tawa.

Shikulob ge ge mî, ǂharo ra !gôagu Covid-19 ǀae-aon digu ge ǀgaisa ǁgâiba ǀkharisi ǂurusib direktorats ai ra ǁgui, !gōsase ǂurusib mâisan sîsen!nansens, !narixūn, ǀaesen hâ coronas xa khoena ǀguri ūhâs !khain tsî ǁnaetisa ǂurusib !oabadi ais tsîna. 

“Sida ge ra ai!gû Covid-19 !nae!khaidi ǀkha ge ǀhao hâ i khoena ôa tsî !âis, ǂōǂōsigu ǁgamǁaredi, ǀhûhâsigu ǀkha ǁgamǁares tsî hōhō!nâs nē ǁōs ǂnamipes, ǀaehâna nauna xu ǀguri ūhâs tsî ǀguri ūhâsens ǂangâsa tsî ǂâisāhe ra !nae!khaidi dis, tsâsigu ǂnamipe ǂkhâ!nâsa ǀae-aon, sîsenaon tsî !oahâ ǀaokhoena mās, Covid-19 ǁkhōde mûǂams, ǂurusib mâisana !gaeǀaros, ǁkhaubasens saran, ǀae!khōs !nâ ǂhâbasa kai xūn tsî soǀôana ǁamaǂgans tsî Covid-19 !khāǁkhaedi tsîn ǀkha,” tib ge Shikuloba ge mî. 

ǁKhā soab aib ge ǂurusib ministeri, Dr Kalumbi Shangulaba ge mî, ǀasasen ǁîna ra !harasa mâtikō khoen ǁgâudi tawa Covid-19 xa ra ǁōsa. 

“Tā ǁgâudi tawa !âu re huihe ǁoas mâsib !nâts nî sīs kōse. ǁKhāti hâ !khais ge khoen ra !âu tsî Covid-19 ǁgauǁgauden kara hō, o ǀgui !khāǁkhaehe!gûsa. !Khāǁkhaedi ge Covid-19 di ǀae!khō tama hâ. Hanats nî ǁgauǁgaudi nē ǁōs dide ūhâs karao, o ǀaeǁgâub ǁga !gû re,” tib ge gere ǀkhoma.


2021-06-29  Kuzeeko Tjitemisa

Share on social media