New Era Newspaper

New Era Epaper
Icon Collap
...
Home / Air Namibia otaka gandja uutekete mboka wali wa kalekwa

Air Namibia otaka gandja uutekete mboka wali wa kalekwa

2020-08-14  Victoria Immanuel

Air Namibia otaka gandja uutekete mboka wali wa kalekwa

Ehangano lyomatukodhila lyoAir Namibia, otali ka gandja ompito yokulundula omasiku guutekete, kwaayehe yali ya ningi omayindilo gawo omanga omasiku ga12 Aguste kwali inaaga thika.
Kehe ngoka a li a ningi eyindilo noAir Namibia omanga omasiku ngoka inaaga adha omolwa omayinyengo ga kalekwa moshilongo ashihe komupresidente gwoshilongo Hage Geingob, otaya ka lundulula omasiku gawo komasiku  ngoka ya hala, okuza mo 30 Aguste nuumvo.
Omukuluntu gomakwatathano mehangano moka Twaku Kayofa, okwa ti  oodhila odha kalekwa okulonga uule womasiku 16 okuza 12 sigo 29 Aguste nuumvo.

“Oodhila meni lyoshilongo otadhi ka tameka okulonga oku za momasiku 30 Aguste, omanga dhokondje yoshilongo tadhi ka tameka okulonga sha ikolelela kepatululo lyoongamba dhoshilongo, taku tengenekwa  okuza  mo20 Septemba nuumvo,” Kayofa ta ti ngaaka.
Ta fatulula ta ti, shika okwali sha tulwa miilonga mbala, okulandula nokugwanitha po omalandulathano gatulwa po, okukeelela omukithi gwoCovid-19 kaagu taandeele oshilongo ashihe, ngaashi naana tagu dhumwa guna iipotha tayi yi pombanda kiitopolwa yilwe yoshilongo.
Kayofa okwali a yelitha kutya, kehe ngoka taka lundulula omasiku gokatikete ke, oteke shi ninga oshali kaa pe na okufutulula.
“Shika otashi ka ningwa okuza momasiku moka oodhila dhomeni lyoshilongo ta dhi ka tameka okulonga sigo momasiku 31 Kotoba nuumvo,” Kayofa a popi ngaaka.

Ta ti, ehangano otali kondjo pamwe niilongo ayihe muuyuni, ya taalela omahepeko oshowo omaso gomukithi nguka, okugulwitha nokugusinda. 
“Aafalelwa, aanilonga yetu oshowo kehe gumwe, otuya na komitima dhetu onkene otuna okuninga shoka shili mondjila okukeelela omukithi nguka,” Kayofa ta ti ngaaka.  
Iitopolwa mbyoka yi na uupale weedhila, Ovenduka nOmbaye oyina iipotha yili pombanda unene, mbyoka  tayi londo ya uka pombanda kehe esiku. 


2020-08-14  Victoria Immanuel

Tags: Khomas
Share on social media