Festus Hamalwa

Martha Amadhila okwa ti okwa hafa eshi a kufa etokolo lomondjila opo a ete po oshikunino shaye opo a shiive okulonga ounona oikunomwa, osho paife hashi mu kwafele opo aha longife vali oshimaliwa mokulanda oikulya yoikunomwa.

Amadhila oku na oshikunino shaye meumbo laye mOngwediva, omo a kuna mo oikunomwa ya yooloka ngaashi omatano, eenyanga, unakandesha, omamengo, nosho tuu.

Okwa ti oku na ohokwe yokulonga moikunino, noha longo ounona opo va kale ve na eudeko nefimano lounamapya okudja peedula dopetameko. Amadhila ou moshikunino okwa kala mo oule weedula mbali pafe.

“Ohandi tuu ovadali omukumo opo va kale tava longo ooyembudangele nghee sha fimana okweeta po oikunino shaashi eshi otashi vape ohokwe younamapya patame ko,” Amadhila ta ti.

Kepulo ngeenge Amadhila okwa monene nande omadeulo e na sha nounamapya ota ti, ye okwe lilongela ashike kuye mwene nokupula omayele kwaavo ve na ounongo kombinga younamapya.

“Ovanhu ava ve na edu lakula ova pumbwa okukala teve lilongifa nawa, va kale tave litopola moimungu ya yooloka omo mu na okukunwa oikunomwa yomaludi ahapu. 

Eshi osho omukalo muwa tau va kwafele opo va kale ve shi okukuna oikunomwa ya yooloka voo vashiive oku landifa velimonene oiyemo,” osho a ti ngaho.

Amadhila okwa ti oshiwa ngeenge ovakwashiwana tava kale ve na oikunino momaumbo opo vaha kale vali tava longifa oshimaliwa shihapu mokulandu oiimati. 

“Onghee nashi kale oshinakuwanifa shetu ongaa ovadali tu kale atu longo ounona vetu momaumbo nghee oikunino yafimana opo ngeenge navo vakulu vashiive oku kala tava ningi oikunino yavo, shoo tashi kale omukalondjikilile kuvo,” Amadhila ta ti.

Okwa ti okwa pumbwa edu apa ta dulu ok ninga oshikunino shakula opo a shiive oku kala ta yandje oilonga kovanyasha. 

Okwa twa ovaNamibia omukumo opo va kale tava longo oikulya yoikunomwa.