New Era Newspaper

Icon Collap
...
Home / Amunkete ta talele po oshiwana shaye 

Amunkete ta talele po oshiwana shaye 

2021-11-29  Festus Hamalwa

Amunkete ta talele po oshiwana shaye 
Top of a Page

Kansela woshikandjohoololo shaTsandi Junias Amunkete okwa ti okwe li pyakidila nokutalela po omikunda da yooloka domoshikandjohoololo shaye opo a kale a shaneke ovakalimo aveshe vakundafane kombinga yomashongo va talela. 

Kansela okwa ti elalakano lokutalela po oshiwana shaye okukala va topolafana omayele kombinga nghee vena okuhymbula po oshikandjohoololo nokukala yo vali a didilika omaupyakadi a talelwa koshiwana.

Edi Amunkete okwe di popya Etitano pefimbo a ninga eenghundafana naKundana eshi a hokolola ta ti paife okwa talela po omikunda dili 14 a ninga omutumba noshiwana mwakwatelwa ovanyasha.

Okwa ti ombelewa yaye otai lalakanene okukala ya yandja omayakulo koshiwana nokukala yoo vali a kale eshivike koshiwana tashi pitile mokutalela po ovakalimo aveshe.

“Okukala uli omutumba mombelewa kashishi oilonga, ashike oilonga yoshili ngeenge kansela tai moshiwana opo a kundafane noshiwana kombinga yomashongo aa va talela onghee eshi otashi kwafele kansela a longe noupu ngeenge a shakaneka oshiwana shaashi ovanhu ohava kala vena omhito ya wana okuyandja omanyenyeto avo kukansela,” Amunkete ta ti.

Kansela okwa ti pefimbo a shakeneka oshiwana okwa didilika unene omhumbwe yomeva oyo tai ndana onghandangala moshikandjohoololo shaye eshi muna eepomba dihapu dapate ita di longo vali sha etwa koupyakadi womunino tau ende kashona.

“Onda shakeneka yoo vali novanyasha opo tu kundafane kombinga yefimana younamapya kovanyasha opo tu kale twa xwaxwameka ovanayasha va kale vena ohokwe yokuninga oikunino yavo,” Amunkete ta ti.

Okwa ti ovanyasha vahapu okwa li vau lika vena ohokwe yokutameka oikunino yavo ashike ova hokololela kansela kutya ova talela eshongo loshimaliwa shokulanda oikwafifo yokuninga oshikunino.

“Otwa kundafana yoo vali kombinga yomapeya taa pi moshikandjohoololo shetu eshi twa didilika omakove ahapu a ninga oihakanwa yomundilo womapeya,” Amunkete ta ti.

Okwa kunghulila oshiwana opo shi kale tashi lopotele ombelewa yaye ngeenge sheli hange shili moupyakadi opo ombelewa i kale ya ninga omalongekido.

fhamalwa@nepc.com.na


2021-11-29  Festus Hamalwa

Share on social media
Bottom of a page