Omuhwahwameki gwiinyangadhalwa ya pamba aakwashigwana momidhingoloko noshowo omutoti gwehangano lyedhina Affirmative Repositioning (AR) okwa hokolola kutya yo itaya ka yambidhidha nande omuntu kehe ngoka ta ka thikama onga omuulikwahogololwa muukansela oshoka omawi gawo kageshi goshali.

Ndhika Job Amupanda okwe dhi hokolola mEtitatu lyoshiwike shika moshigongalele shaatoolinkundana moka a li ta nothele ko aakundaneki komalalakano gwiinyangadhalwa yehangano ndyoka.

Okwa ti ngashingeyi aanyanyamagulu oyendji oye li tayi itungile uugumbo kutya otaya thikama onga aawulikwa ya ithikamena pomahogololo ngoka twa taalela nuumvo gwookansela yoondoolopa noshowo yiikandjohogololo ashike yo otaya ka yambidhidha ashike mboka ya kala nale taya kutha ombinga miinyangadhalwa yawo.

“Nonando otatu yambidhidha nawa noonkoondo aawulikwa ya ithikamena, tse otatu ka gandja ashike omawi omaanawa neyambidhidho lya kola kwaamboka ya kala aaholi naalanduli yiinyangadhalwa yetu omimvo adhihe ndhoka ashike kashi shi omuulikwa a ithikamena kehe,” osho omulumentu omugundjuka a kwandjangele ngaaka komeho gaanyanyamagulu ooyakwawo mboka ya li ye ya okwuuyuvila ko pamwe naatoolinkundana.

Amupanda okwa ti ngashiingeyi oku li po ha mono oongodhi tadhi dhenge tadhi zi kaagundjuka mboka taya pula omayambidhidho pomahogololo ashike okwa dhenge omuthindo kutya mboka taya ka yambidhidhwa kehangano lyawo otaya dhindwa nawa manga inaaya kutha ombinga.

“Otatu ka kala tu na oshimpwiyu kutya otwa ninga oshigongalele shoka tashi ka dhinda nawa ayehe mboka tatu ka yambidhidha sho taya ka kutha ombinga  momahogololo naya kale haya kutha ombinga miinyangadhalwa yetu. Nenge haya kondjitha omashongo ngoka ga taalela aantu momidhingoloko dhawo opo ashike tu ya yambidhidhe,” ta hokolola ngaaka. Okwa tsikile ko kutya ngashiingeyi nookalyamupombo otaya kutha ombinga muukansela ashike AR itaka ninga nande epuko ndyoka mokuyambidhidha mboka ya puka. Noho mboka oye na okudhindwa tango miikandjohogololo omanga inaye ya okudhindwa kOvenduka hoka taku ka kala oshigongi oshinene shoka tashi ka endwa ashike kaantu mboka ya hiwa oku shi enda.
“Oshigongi shoka itashi ka kala sha kehe gumwe. Ihe oshaamboka ya hiywa nenge ya ninga eyindilo oku shi enda neindilo ndyoka olya ziminwa,” osho Amupanda ngoka a li a zala omakalaganya taga ulike iilonga a hokolola.